टेली आयसीयू पुन्हा सुरू करा

उस्मानाबाद : जिल्ह्यातील रुग्णांचा वाढता मृत्युदर, विशेषज्ञांची कमतरता व आयसीयूमधील रुग्णांची वाढती संख्या लक्षात घेता टेली आयसीयू सुविधा पुन्हा कार्यान्वित करण्याची मागणी आमदार राणाजगजितसिंह पाटील यांनी जिल्हाधिकारी कौस्तुभ दिवेगावकर यांच्याकडे गुरुवारी केली आहे.

गतवर्षी कोरोनाच्या पहिल्या लाटेदरम्यान रुग्णांसाठी क्लाऊड फिजिशियन हेल्थकेअर या कंपनीच्या माध्यमातून व सीएसआरच्या मदतीने जिल्हा रुग्णालयात टेली-आयसीयू सुविधा कार्यान्वित केली होती. या माध्यमातून आयसीयूमधील प्रत्येक रुग्णांची २४ तास निगराणी केली जात होती. तज्ज्ञ डॉक्टर्सकडून उपचाराची कार्यप्रणाली ठरवून त्याप्रमाणे उपचार केले जात होते. सीसीटीव्ही कॅमेऱ्यामुळे तज्ज्ञांना देशातून कोठूनही रुग्णांची देखरेख व इलाज करणे शक्य होते. या सुविधेचा मोठा फायदा झाला होता व सीएसआर निधीमुळे शासनावर कोणताही आर्थिक भार पडला नव्हता.

आजची परिस्थिती पाहता आयसीयूमधील रुग्णांची संख्या ६० पेक्षा जास्त आहे. ऑक्सिजन सुविधेचे बेड आणि व्हेंटिलेटर कमी पडत आहेत. तसेच तज्ज्ञ डॉक्टरांची संख्या मर्यादित असल्यामुळे रुग्णांचे आयसीयूमध्ये उपचार करीत असताना निगराणी राखण्यात व वेळेवर औषधोपचार करण्यात मर्यादा येत आहेत.

सरकारी रुग्णालयातील ४०० पेक्षा जास्त उपचाराधीन रुग्णांच्या उपचारासाठी केवळ दोन फिजिशियन, व दोन भूलतज्ज्ञ आहेत. त्यामुळे टेली मेडिसिनचा वापर अनिवार्य वाटतो. ही बाब गांभीर्याने घेऊन तातडीने टेली आयसीयू कार्यप्रणाली कार्यान्वित करावी, अशी मागणी आमदार राणाजगजितसिंह पाटील यांनी जिल्हाधिकारी कौस्तुभ दिवेगावकर यांच्याकडे केली आहे.