दाळिंबचा रस जाफरींच्या पेल्यात

तुरोरी : तुरोरी येथे सत्ताधारी सेना-भाजपच्या विरोधात व्यापारी महासंघाने पॅनल उभा केले होते. तर काँग्रेसने ऐनवेळी माघार घेतली होती. निवडणूक रिंगणात आठ अपक्षही होते. त्यांना काँग्रेसने पाठिंबा दर्शवीत पूर्ण जोर लावला. निकालात काँग्रेसने पाठिंबा दिलेले आठपैकी सात अपक्ष, सेना-भाजपचे ८ व ज्यांचा मोठा गाजावाजा झाला होता त्या व्यापारी महासंघाचे फक्त दोन सदस्य निवडून आले. येथे निवडणुकीत कुणाच्याही ध्यानीमनी नसलेली काँग्रेस, व्यापारी महासंघाच्या दोन सदस्यांना सोबत घेऊन सत्ता स्थापू शकते.

गुंजोटी : उमरगा तालुक्यातील मोठे गाव असलेल्या गुंजोटी येथे सत्ताधारी काँग्रेस- राष्ट्रवादीचा शिवसेनेने सपशेल पराभव केला. सेनेच्या एम.एस. सुलतान यांनी प्रतिष्ठा पणाला लावून सत्ता काबीज केली आहे. तर काँग्रेसकडून माजी सरपंच शंकर पाटील, सिद्राम देशमुख यांनीही प्रचाराची धुरा सांभाळत धुरळा उडविला होता. मात्र, जनतेचा कौल आपल्या बाजूने वळविण्यात त्यांना यश मिळाले नाही. गुंजोटीत शिवसेना १२, काँग्रेस २, भाजप १, माजी सैनिक १ व एका अपक्षास संधी मिळाली आहे.

कुन्हाळी : गेल्यावेळी गावातील सत्ता विरोधकांच्या हाती गेली असतानाही विरोधकांचे सदस्य आपल्या बाजूने वळवून ग्रामपंचायत ताब्यात ठेवल्यानंतर यावेळी आपली प्रतिष्ठा पणाला लावून काँग्रेसचे जि.प. सदस्य प्रकाश आष्टे यांनी कुन्हाळी ग्रामपंचायतीमध्ये सत्ता मिळविली आहे. भाजप, सेना, राष्ट्रवादी यांच्या आघाडीला २ तर अपक्षांनाही २ जागेवर यश मिळाले. काँग्रेसने ७ जागांवर विजय मिळवीत सत्ता प्राप्त केली.