धाराशिव : तालुक्यातील एका गावात सुमारे अडीच वर्षांपूर्वी एका नराधमाने अल्पवयीन मुलीवर लैंगिक अत्याचार केला होता. जामिनावर सुटल्यानंतर पुन्हा त्याने त्याच पीडितेवर अत्याचार केला. याबाबत शनिवारी ढोकी ठाण्यात गुन्हा नोंद करण्यात आला.
ढोकी ठाण्याच्या हद्दीत असलेल्या एका गावातील ८ वर्षीय मुलीचे आईवडील हे मजूर काम करतात. सुमारे अडीच वर्षांपूर्वी गावातीलच ५६ वर्षीय नराधमाने या अल्पवयीन मुलीस एकटी असल्याचे पाहून तिच्यावर लैंगिक अत्याचार केला होता. या आरोपाखाली तुरुंगात असलेला आरोपी नुकताच जामिनावर सुटला. यानंतर त्याने पुन्हा शुक्रवारी सायंकाळी पीडित मुलीला गाठले.
तिचे आईवडील हे कामासाठी बाहेरगावी गेल्याने तिच्या घरी जाऊन बिस्किटांचे आमिष दाखवत आरोपीने तिला बाहेर नेले. गावाजवळील एका निर्जनस्थळी नेऊन अल्पवयीन मुलीवर पुन्हा अत्याचार केला. हा प्रकार लक्षात आल्यानंतर पीडित मुलीच्या आईने ढोकी ठाण्यात धाव घेऊन तक्रार दिली. यावरून पोलिसांनी आरोपीवर लैंगिक अत्याचाराचा गुन्हा दाखल केला आहे.