सात कर्मचाऱ्यांना नोटीस

वेळेवर कार्यालयात उपस्थित नसणाऱ्या सात कर्मचाऱ्यांना कारणे दाखवा नोटीस, बातमी

कार्यालयात उशिरा येणे आले अंगलट

उमरगा : राज्य सरकारने कार्यालयीन कामकाजासाठी पाच दिवसांचा आठवडा केला. मात्र, कार्यालयीन वेळेत थोडी वाढ केली. दरम्यान, कार्यालयात वेळेत उपस्थित न राहणे, कामकाजाच्या वेळेत दांडी मारण्याचे प्रकार कर्मचाऱ्यांकडून केले जातात. मंगळवारी कार्यालयात उपस्थित राहण्याची वेळ सकाळी पावणेदहाची असताना उमरगा तहसील कार्यालयात काही कर्मचारी सकाळी सव्वा अकरापर्यंत उपस्थित नव्हते. त्यामुळे अशा सात कर्मचाऱ्यांना प्रभारी तहसीलदारांनी ‘कारणे दाखवा नोटीस’ बजावली आहे.

तहसील कार्यालयात विविध कामांसाठी ग्रामीण भागातून अनेक नागरिक येतात. कामे करून घेण्यासाठी, कागदपत्रे मिळविण्यासाठी कार्यालयात व अधिकाऱ्याकडे चकरा मारून नागरिकांची चांगलीच दमछाक होते. बरेच कर्मचारी कामकाज प्रामाणिकपणे करतात; परंतु, काही कर्मचाऱ्यांच्या वेगळ्याच रूबाबाला सहन करण्याची वेळ नागरिकांवर येते. दरम्यान, मंगळवारी प्रभारी तहसीलदार एन. आर. मल्लूरवार, नायब तहसीलदार (पुरवठा) संभाजी थोटे यांनी उशिरा आलेल्या कर्मचाऱ्यांचा ज्या-त्या विभागात पंचनामा केला. त्यात महसूल विभागातील तीन कर्मचारी, एक अव्वल कारकून, तर तीन शिपाई गैरहजर दिसून आले. त्यामुळे या सर्वांना ‘कारणे दाखवा नोटीस’ बजावण्यात आली आहे.

नवीन तहसीलदारांच्या नेमणुकीची प्रतीक्षा

तहसीलदार संजय पवार यांची बदली झाल्याने निवडणूक विभागाचे नायब तहसीलदार एन. आर. मल्लुरवार यांच्याकडे ९ ऑगस्टपासून पदभार आहे तसेच तहसील कार्यालयातील एकूण पाच नायब तहसीलदारांच्या जागांपैकी महसूल विभागातील दोन जागा रिक्त आहेत. नवीन तहसीलदार यांची नेमणूक झाली नसल्याने तहसील कार्यालयातील कर्मचारी निवांत आपल्या मर्जीने वावरत असताना प्रभारी तहसीलदारांकडून झालेल्या अचानक कारवाईने कर्मचाऱ्यांमध्ये एकच खळबळ उडाली आहे.