होरपळलेल्या डॉक्टरच्या मृत्यूचे गूढ कायम

उस्मानाबाद : शहरातील एका डॉक्टरचा कारमध्ये होरपळून मृत्यू झाल्याची घटना बुधवारी सायंकाळी उजेडात आली होती. रात्री उशिरा मृतदेहाची ओळख पटल्यानंतर पोलिसांनी या मृत्यूची शहर ठाण्याला नोंद घेत तपास सुरू केला आहे. दरम्यान, या घटनेतील पुरेसे कोणतेही कंगोरे पोलिसांच्या हाती नसल्याने घात, अपघात आणि आत्महत्या अशा तिन्ही बाजूने तपास करण्याचे आव्हान उभे आहे.

उस्मानाबाद शहरात वास्तव्यास असलेले डॉ.रवींद्र करपे हे तालुक्यातील येडशी येथे प्रॅक्टिस करीत होते. तेथे त्यांचा दवाखानाही होता. मात्र, मागील दोन महिन्यांपासून हा दवाखाना बंदच असल्याचे प्राथमिक चौकशीतून समोर आले आहे. बुधवारी सायंकाळी साडेचार वाजण्याच्या सुमारास धुळे-सोलापूर महामार्गावरील ग्रीनलँड शाळेच्या बाजूच्या मोकळ्या आवारात एक कार पेटल्याचे तेथून प्रवास करणाऱ्या काहीजणांच्या लक्षात आले. ही माहिती शहर पोलिसांना कळाली. ते पोहोचेपर्यंत आगीने पूर्ण कार कवेत घेतली होती. आग विझविल्यानंतर आत एक मृतदेह ड्रायव्हिंग सीटवर असल्याचे निदर्शनास आले. घटनास्थळाचा पंचनामा करून शहर पोलिसांनी मृतदेह उत्तरीय तपासणीसाठी जिल्हा रुग्णालयात नेला. या मृत्यूची नोंदही घेतली. रात्री हा मृतदेह डॉ.करपे यांचा असल्याचे स्पष्ट झाले. पोलिसांच्या प्राथमिक तपासात ते आर्थिक अडचणीत असल्याचे समोर येत आहे. असे असले तरी ही घटना म्हणजे घात की अपघात किंबहुणा आत्महत्याही असू शकते. अशा सर्व शक्यतांची पडताळणी पोलिसांनी आता सुरू केली आहे. डॉ.करपे यांचा व्हिसेरा फॉरेन्सिक लॅबला पाठविण्यात आला असून, त्याचा अहवाल मिळाल्यानंतर तपासाला योग्य दिशा मिळू शकते.

घात..?

मयत डॉ.रवींद्र करपे हे प्राथमिक तपासात आर्थिक अडचणीत असल्याचे समाेर येत आहे. आर्थिक देवाण-घेवाणीतून तर हा प्रकार घडला नसावा, अशीही शंका व्यक्त केली जात आहे. कारमध्ये मृतदेह बांधलेल्या अवस्थेत होता, अशा चर्चा सुरुवातीला उठल्या होत्या. मात्र, नंतर याठिकाणी बांधल्याचा खाणाखुणा आढळल्या नसल्याचे सूत्रांनी सांगितले. मात्र, उत्तरीय तपासणी अहवालातून मृत्यू होरपळल्यानेच झाला की तत्पूर्वीच झाला होता, हे स्पष्ट झाल्यास घाताच्या दिशेनेही तपास होऊ शकतो.

अपघात..?

डॉ.करपे यांची कार ही मोकळ्या जागेत उभी होती. कारच्या काचा बंद अवस्थेत होत्या. आगीनंतर त्यांचा एकच मृतदेह यात आढळून आला. एसी सुरू ठेऊन वाहनात काही अग्निजन्य पदार्थ पेटविला जाऊन कारने पेट घेतला असावा, अशीही शक्यता आहे. मात्र, वायरल व्हिडिओत कार मागून पेटलेले दिसत आहे. दरम्यान, या कंपनीच्या काही डिफेक्टेड असल्याची माहिती कळल्यानंतर पोलिसांनी कंपनीकडे या कारबाबत माहिती मागिवली आहे. यातून ही कार आपोआप तर पेटली नसेल, या शंकेचे उत्तर मिळविण्याचा प्रयत्न होत आहे.

आत्महत्या..?

डॉ.करपे यांचा येडशी येथील दवाखाना दोन महिन्यांपासून बंद होता. काही आर्थिक अडचणी असाव्यात. कुटुंबातील काही मालमत्ताही नुकतीच विक्री झाल्याची प्राथमिक माहिती पोलिसांच्या हाती लागली आहे. यातून ते डिप्रेशनमध्ये जाऊन हा प्रकार घडला असावा, या शक्यतेवरही काम केले जात आहे. मात्र, तूर्त घात किवा अपघात यावरच पोलिसांचा अधिक फोकस आहे. मृत्यूबाबतचा अहवाल प्राप्त झाल्यानंतरच यापैकी घात-अपघात किंवा आत्महत्या याबाबतचा बराचसा खुलासा होण्याची शक्यता आहे.