तुळजापूर - भरधाव वेगातील कंटेरने रस्त्याच्या कडेला उभा असलेल्या ट्रकला पाठीमागून जाेराची धडक दिली. या भीषण अपघातात कंटेनरचालक जागीच ठार झाला. ही घटना उस्मानाबाद ते तुळजापूर या मार्गावरील बाेरी गावानजीक ३० नाेव्हेंबर राेजी पहाटे ३ वाजण्याच्या सुमारास घडली.
याबाबत अधिक माहिती अशी की,मयत चालक दिनेशकुमार वर्मा (वय २८, रा. गुरगाव-हरियाणा) येथून कंटेनरमध्ये (क्र.एचआर. ५५-व्ही. ७४१०) कुरिअर घेऊन सोलापूर मार्गे बेंगलोरकडे जात हाेते. भरधाव वेगातील हा कंटेनर मंगळवारी पहाटे ३ वाजण्याच्या सुमारास तुळजापूर-साेलापूर मार्गावरील बाेरी गावानजीक आला असता, रस्त्याच्या कडेला उभा असलेल्या ट्रकला (क्र. जीजे.१०-झेड.६६६५) पाठीमागून जाेराची धडक दिली. हा अपघात एवढा भीषण होता की, कंटेनरचे हेड अक्षरश चक्काचूर झाले. यात चालक दिनेशकुमार वर्मा व क्लिनर अनिलकुमार हे दोघेही हेडमध्ये अडकून पडले हाेते.
यातील क्लिनर कसाबसा सुखरूप बाहेर आला. तर चालकास बाहेर पडता आले नाही. ही घटना पाहून काही अंतरावर असलेल्या हाॅटेलमधील कामगार कंटेनरच्या दिशेने धावले. सर्वांनी मिळून चालक वर्मा यांना बाहेर काढून तातडीने उस्मानाबाद येथील जिल्हा रूग्णालयात पाठविले. परंतु, रस्त्यातच त्यांची प्राणज्याेत मालवली. अपघाती घटनेची माहिती मिळताच बीट अंमलदार कमलकिशोर राऊत, पाेहेकाॅ. के. डी. चौधरी यांनी घटनास्थळास भेट देवून पंचानामा केला.