ढाब्यांवरून बायोडिझेलची चोरटी विक्री, ५ ठिकाणी पडल्या धाडी

उस्मानाबाद/तुळजापूर : जिल्ह्यात अवैधरित्या ढाब्यांवरून बायोडिझेलची सर्रास विक्री सुरु आहे. याबाबत पेट्रोलपंप चालकांच्या संघटनेने आक्षेप घेतल्यानंतर गुरुवारी सायंकाळी अचानक पाच ठिकाणी धाडी टाकण्यात आल्या. महसूल व पोलिसांच्या पथकाने केलेल्या कारवायांत सुमारे साडेपाच लाखांचे बायोडिझेल ताब्यात घेतले आहे.

पेट्रोलपंप चालकांच्या संघटनेने काही दिवसांपूर्वीच बायोडिझेलच्या चोरट्या धंद्याचे गा-हाणे जिल्हाधिकारी कौस्तुभ दिवेगावकर यांच्याकडे मांडले होते. याअनुषंगाने दिवेगावकर यांनी महसूल व पोलिसांचे एक पथक तयार करुन कारवाईचे आदेश दिले होते. त्यानुसार पक्की माहिती काढून गुरुवारी सायंकाळपर्यंत तुळजापूर तालुक्यातील जळकोट व परिसरात सुरु असलेल्या या धंद्याचा पर्दाफाश केला. येथे चक्क ढाब्यांवरुनच चोरट्या पद्धतीने बायोडिझेल विकले जात असल्याचे निष्पन्न झाले. पहिली कारवाई ही सोलापूर-हैदराबाद महामार्गावरील आरोपी दिनकर प्रभाकर सुरवसे यांच्या जयशंकर ढाब्याच्या पाठीमागील पत्र्याच्या शेडवर झाली. येथे टाकलेल्या धाडीत ५०० लिटर्स बायोडिझेल व ८ हजार ५०० लिटर्स ज्वलनशील पदार्थ आढळून आला. याच महामार्गावरील सचिन दगडू हासुरे यांच्या रामदेव हॉटेलच्या पाठीमागील शेडमध्ये ६५० लिटर्स डिझेलसदृश पदार्थ आढळून आला. तर जळकोट रोडवरील सत्यनारायण शिवाजी कदम यांच्या गणेश ढाब्यामागे ६ टाक्यांमध्ये ४५० लिटर्स बायोडिझेलसदृश पदार्थ आढळून आला आहे. उपरोक्त तिघांवरही नळदुर्ग ठाण्यात रात्री उशिरा गुन्हा दाखल करण्यात आला.

दोघांनी केला साठा नष्ट...

जळकोट शिवारातील खासिम पापुन जमादार यांच्या हॉटेल गारवाच्या पाठीमागे असलेल्या रेस्ट रुममध्ये नोझल मशिन, मोटार तसेच अनेक बॅरल आढळले. यातील एका बॅरलमध्ये दोन बॅरमध्ये २५ लिटर्स बायोडिझेलसदृश पदार्थ आढळला. तर इतर बॅरलमधील हा पदािर् कारवाईच्या भितीने नष्ट केल्याचा संशय पथकाने व्यक्त केला आहे. असाच प्रकार शेषेराव शंकर काळे यांच्या हॉटेल महाराजाच्या पाठीमागे आढळला. येथे केवळ ५ लिटर्स डिझेल आढळले. तर १२ टाक्या रिकाम्या दिसून आल्या. उपरोक्त दोघांवरही नळदुर्ग ठाण्यात गुन्हा नोंदविण्यात आला आहे.