ट्रकचालकावर गुन्हा दाखल

अपघातात एक ठार, एकजण गंभीर

उस्मानाबाद : तुळजापूर तालुक्यातील मंगरुळ येथील सोमनाथ अंगद शिंदे यांनी २३ फेब्रुवारी रोजी हंगरगा (तुळ) फाटा चौकातील वळणावर त्यांच्या ताब्यातील वाहन (क्र. एमएच १३- एझेड ८०५२) निष्काळजीपणे चालवून (क्र. एमएच २५- झेड १६७७) या दुचाकीला समोरून जोराची धडक दिली. या अपघातात उस्मानाबाद येथील दुचाकीचालक गणेश उत्तम काळे (वय २२) हे मयत झाले तर पाठीमागे बसलेले काशीनाथ राजाराम पवार हे गंभीर जखमी झाले. याप्रकरणी काशीनाथ पवार यांच्या फिर्यादीवरून तुळजापूर पोलीस ठाण्यात गुन्हा दाखल झाला आहे.

कारच्या धडकेत एकजण जखमी

उस्मानाबाद : कारच्या धडकेत एकजण जखमी झाल्याची घटना शहरातील भानुनगर पाटीजवळ ५ फेब्रुवारी रोजी घडली. येथील धनंजय निवृत्ती जाधव हे भानुनगर पाटीजवळ थांबले असताना (क्र.एमएच २५- आर ४६७८) या क्रमांकाच्या कारचालकाने निष्काळजीपणे वाहन चालवून जाधव यांना जोराची धडक दिली. या अपघातानंतर नमूद कारचा चालक घटनास्थळावरून पसार झाला. याप्रकरणी धनंजय जाधव यांनी १ मार्च रोजी दिलेल्या फिर्यादीवरून येथील आनंदनगर पोलीस ठाण्यात गुन्हा दाखल करण्यात आला आहे.

रस्ता वापरावरून एकास मारहाण

उमरगा : तालुक्यातील पळसगाव येथील प्रवीण माधव काळे हे २४ फेब्रुवारी रोजी त्यांच्या शेतात काम करीत होते. यावेळी गावकरी माधव, दिलीप व विजय सूर्यवंशी या तिघा बंधुंसह सौदागर व युवराज सोमवंशी, महेश मुंगळे, बाळू सुरवसे यांनी शेतातील रस्त्याच्या वापरावरून प्रवीण काळे यांना मारहाण केली. यात प्रवीण यांच्या उजव्या हाताचे हाड मोडले. याप्रकरणी प्रवीण काळे यांनी दिलेल्या फिर्यादीवरून उमरगा पोलीस ठाण्यात विविध कलमांन्वये गुन्हा दाखल करण्यात आला आहे.

पिकाच्या वाटणीवरून दोन गटांत मारहाण

उस्मानाबाद : हरभरा पिकाची अर्धी वाटणी करण्याच्या कारणावरून सारोळा (बु) येथील तृप्ती राजाभाऊ देवगिरे यांच्यासह कुटुंबीयांचा गावकरी रेखा गौतम मोहीरे व त्यांच्या कुटुंबीयांशी २३ फेब्रुवारी रोजी शेतात वाद होऊन याचे पर्यावसान हाणामारीत झाले. यावेळी दोन्ही कुटुंबातील महिला, पुरुषांनी परस्परविरोधी गटातील महिला, पुरुषांना शिवीगाळ करून मारहाण केली. यावरून दोन्ही कुटुंबातील महिला सदस्यांनी दिलेल्या दोन स्वतंत्र फिर्यादीवरून गुन्हे दाखल झाले आहेत.

जुन्या वादातून फावड्याने मारहाण

उस्मानाबाद : जुन्या वादातून एकाच्या डोक्यात उलट्या फावड्याने घाव घालून व दगडाने मारहाण करून गंभीर जखमी केल्याची घटना तालुक्यातील ढोकी येथे २७ फेब्रुवारी रोजी घडली. ढोकी येथील प्रवीण टेकमन पटेल हे त्यांच्या घरासमोर बसले असताना जुन्या वादातून गावकरी स्वप्निल कावळे ऊर्फ चिट्ट्या याने प्रवीण यांच्या डोक्यात उलट्या फावड्याने घाव घालून व दगडाने मारहाण करून गंभीर जखमी केले. याप्रकरणी प्रवीण पटेल यांनी वैद्यकीय उपचारादरम्यान दिलेल्या तक्रारीवरून ढोकी पोलीस ठाण्यात गुन्हा दाखल करण्यात आला आहे.

खोलीकरण पूर्ण

तुळजापूर : येथील गंकज शहाणे यांनी स्वखर्चातून बोरी धरणाच्या उगमापासून खोलीकरणाचे काम सुरू केले आहे. याला नागरिकांचादेखील चांगला प्रतिसाद मिळत असून, मंगळवारपर्यंत सुमारे पाच किमी खोलीकरणाचे काम पूर्ण झाले आहे.

अपघाताचा धोका

उमरगा : तालुक्यातील गुंजोटी येथील भोगावती कठडे ऑक्टोबरमध्ये झालेल्या अतिवृष्टीत वाहून गेले. यामुळे सध्या हा पूल धोकादायक बनला असून प्रशासनाने याकडे लक्ष देऊन कठडे बांधून घ्यावेत, अशी मागणी होत आहे.

वाहनधारक त्रस्त

उस्मानाबाद : शहरातील समता नगर भागात सह्याद्री कॉर्नर ते डॉ. बाबासाहेब आंबेडकर पुतळा या दरम्यानच्या रस्त्यावर अनेक ठिकाणी खड्डे पडले आहेत. यातील काही खड्डे अत्यंत धोकादायक बनले असून, ते बुजवून घ्यावेत, अशी मागणी होत आहे.

मंदिरात स्वच्छता

तुळजापूर : कोरोनाच्या पार्श्वभूमीवर येथील श्री तुळजाभवानी मंदिरात मंदिर संस्थानचे अधिकारी, कर्मचाऱ्यांनी स्वच्छता व सॅनिटायझेशन मोहीम राबविली. या अभियानात देवी दर्शनासाठी आलेल्या भाविकांनीदेखील उत्स्फुर्त सहभाग नोंदविला.

धनके याची निवड

तुयजापूर : सिंदफळ येथील पैलवान दत्तात्रय ऊर्फ बबलू महादेव धनके याची पुणे येथे होणाऱ्या महाराष्ट्र केसरी स्पर्धेसाठी ५७ किलो वजनगटातून निवड झाली आहे. धनके हा सध्या वस्ताद सुंदर जवळगेकर यांच्या मार्गदर्शनाखाली प्रशिक्षण घेत आहे.