तुळजापूर : अखिल भारतीय गोंधळी समाज संघटनेच्या सोमवारी येथे पार पडलेल्या विशेष सर्वसाधारण सभेत प्रदेशाध्यक्षपदी राजेंद्र गायकवाड आणि मुंबई प्रदेश अध्यक्षपदी दिलीपराव शिंदे यांची निवड करण्यात आल्याची माहिती संघटनेचे राष्ट्रीय कार्याध्यक्ष राजेंद्र वनारसे यांनी दिली.
सभेचे उद्घाटन तहसीलदार सौदागर तांदळे, नगराध्यक्ष सचिन रोचकरी, राष्ट्रीय अध्यक्ष राजेंद्र वनारसे, कर्नाटक प्रदेशाध्यक्ष सिद्राम वाघमारे, स्वागताध्यक्ष राजेंद्र गायकवाड यांच्या उपस्थितीत देवी प्रतिमापूजन व दीपप्रज्वलन करून झाले. यावेळी राष्ट्रीय कार्यकारिणी सदस्य म्हणून सुरेश ढवळे, बाबासाहेब कदम आणि विजय वाघमारे, सुरेश संग्राम काळे यांची राष्ट्रीय सहसचिव म्हणून विशेष निवड करण्यात आली. या सभेत राष्ट्रीय कार्यकारिणीची बैठक १० सप्टेंबर रोजी पुणे येथे घेण्याचे ठरले. तसेच इतरही ठराव संमत करण्यात आले.
यावेळी राष्ट्रीय कार्यकारिणी, महाराष्ट्र कार्यकारिणी, जिल्हा कार्यकारिणी अध्यक्ष यांची निवड करून सत्कार करण्यात आला. प्रारंभी रवी रेणके ग्रुपने गोंधळी गीत सादर केले. प्रास्ताविक राजेंद्र गायकवाड, सूत्रसंचालन ॲड. दत्ता परशुराम घोगरे यांनी केले.
----------