डॉक्टरचा होरपळून मृत्यू; घात की अपघात?

उस्मानाबाद : शहरालगतच्या एका मोकळ्या आवारात जळालेल्या कारमध्ये एका डॉक्टरचा होरपळून मृत्यू झाल्याची घटना बुधवारी सायंकाळी उजेडात आली होती. या डॉक्टरची ओळख मध्यरात्रीच्या सुमारास पटली असून, हे प्रकरण घात, अपघात की आत्महत्या, अशा तिहेरी गुंत्यात अडकले आहे.

उस्मानाबाद शहरातून गेलेल्या धुळे-सोलापूर महामार्गालगत ग्रीनलॅण्ड शाळेच्या बाजूच्या मोकळ्या आवारात बुधवारी सायंकाळी एका कारने पेट घेतला होता. ही कार पूर्णत: जळून गेल्यानंतर आत ड्रायव्हिंग सीटवर एका व्यक्तीचा होरपळलेला मृतदेह आढळून आला. दरम्यान, रात्री उशिरा या मृतदेहाची ओळख पटविण्यात पोलिसांना यश आले. उस्मानाबाद शहरात राहणाऱ्या व येडशी येथे क्लिनिक चालविणाऱ्या डॉ.रवींद्र करपे यांचा तो मृतदेह असल्याचे निष्पन्न झाले. पोलिसांनी घटनास्थळाचा पंचनामा करून मृतदेह उत्तरीय तपासणीसाठी जिल्हा रुग्णालयात दाखल केला. याप्रकरणी शहर ठाण्यात मृत्यूची नोंद घेण्यात आली आहे. दरम्यान, हे प्रकरण नेमके कसे घडले, याबाबत आणखी खुलासा होऊ शकला नाही. घात, अपघात व आत्महत्या अशा तिहेरी बाजूंनी पोलिसांनी तपास सुरू केला आहे. मयत डॉ.करपे यांचा व्हिसेरा घेऊन तो फॉरेन्सिक तपासणीसाठी प्रयोगशाळेकडे पाठविण्यात आला आहे. प्रयोगशाळेचा अहवाल आल्यानंतर बऱ्याचशा गोष्टी स्पष्ट होतील. शिवाय, तपासालाही दिशा मिळू शकेल. तोपर्यंत शहर पोलिसांनी घात-अपघाताच्या दृष्टीने आपला तपास सुरू केला आहे.