धाराशिव : चोराखळी येथील धाराशिव साखर कारखान्याचे चेअरमन अमर पाटील यांचे छायाचित्र वापरून व त्यांची ओळख असल्याचे भासवून अज्ञाताने कारखान्यातील अधिकाऱ्यास सुमारे १ कोटी १० लाखांचा गंडा घातला. फसवणूक झाल्याचे कळताच गुरुवारी सायबर पोलिस ठाण्यात अज्ञाताविरूद्ध फसवणुकीचा गुन्हा दाखल करण्यात आला आहे.
धाराशिव तालुक्यातील चाेराखळी येथील धाराशिव साखर कारखान्याचे अधिकारी बाबासाहेब वाडेकर यांच्या माेबाईलवर १५ एप्रिल राेजी सकाळी पावणेसात वाजल्यापासून ते १७ एप्रिलच्या मध्यरात्री सव्वाएक वाजण्याच्या दरम्यान ७२५९५८०३३८ या भ्रमणध्वनी क्रमांकावरून अनेकवेळा फाेन आला. विशेष म्हणजे, संपर्क साधणाऱ्या ‘त्या’ अज्ञात व्यक्तीने आपल्या ‘डीपी’ला चेअरमन अमर पाटील यांचे छायाचित्र वापरले हाेते. भामट्याने स्वत:ची ओळख लपवून अमर पाटील असल्याचे भासवून बँक खाते क्रमांक २०१०००४३४६६४६४ वर पैसे ऑनलाईन ट्रान्सफर करण्यास सांगितले.
सातत्याने फाेन येत असल्याने अपेक्षित खातरजमा न करता वाडेकर यांनी १ काेटी १० लाख रूपये पाठविले. यानंतर आपली फसवणूक झाल्याचे लक्षात आल्यानंतर त्यांनी सायबर पाेलीस ठाणे गाठून फिर्याद दिली. त्यावरून अज्ञाताविरूद्ध माहिती तंत्रज्ञान सुधारित अधिनियम २००८ अन्वये गुन्हा दाखल करण्यात आला आहे.