जागजी ग्रामपंचायतीवर सेनेचा झेंडा

सरपंचपदी लक्ष्मण बनसोडे, उपसरपंचपदी सावंत यांची वर्णी

तेर : तालुक्यातील जागजी ग्रामपंचायतीवर शिवसेनेचा भगवा फडकला. सरपंचपदी लक्ष्मण बनसाेडे तर उपसरपंचपदी वैजिनाथ सावंत यांची वर्णी लागली. निवडीनंतर पदाधिकारी, कार्यकर्त्यांनी जल्लाेष केला.

जागजी ग्रामपंचायत निवडणुकीत खा.ओमराजे निंबाळकर यांच्या मामाश्रीच्या पॅनलने १३पैकी ८ जागा जिंकून सत्ता काबीज केली. यानंतर, सरपंच, उपसरपंच निवडीसाठी विशेष सभा बोलविण्यात आली असता, दाेन्ही पदांसाठी मतदान घेण्यात आले. शिवसेनाप्रणित पॅनलप्रमुख नानासाहेब पाटील यांच्या स्पष्ट बहुमत असतानाही या निवडीत विरोधी पॅनल प्रमुखांनी आपले उमेदवार उभे करून निवडीत रंगत आणली. शेवठी १३ पैकी ८ सदस्यांनी शिवसेनाप्रणित पॅनलला मतदान केल्याने लक्ष्मण बनसोडे यांची सरपंचपदी, तर उपसरपंचपदी वैजिनाथ सावंत यांची वर्णी लागली. निवडीनंतर नव्या कारभाऱ्यांनी गावातून जंगी मिरवणूक काढली.