अंतर्गत गटबाजीमुळे राष्ट्रवादी विरोधी बाकावर !

पारगाव : वाशी तालुक्यातील पारगाव, जनकापूर ग्रुप ग्रामपंचायतीत राष्ट्रवादी काँग्रेसचे सात सदस्य निवडून आलेले असतानाही एका सदस्याने ऐनवेळी दुसऱ्या गोटात जाऊन सरपंचपद मिळविले. यामुळे बहुमत असतानाही राष्ट्रवादीच्या सदस्यांना आता विरोधी बाकावर बसण्याची वेळ आली आहे. दरम्यान, महेश कोळी याची सरपंच पदावर तर उपसरपंचपदी पंकज चव्हाण यांची निवड झाली.

पारगाव-जनकापूर या ग्रुप ग्रामपंचायतवर आतापर्यंत राष्ट्रवादी पक्षाचे निर्विवाद वर्चस्व राहिलेले आहे. या निवडणुकीत देखील राष्ट्रवादी पक्षाच्या अधिकृत पॅनलचे सात सदस्य व एक अपक्ष असे आठ सदस्य निवडून आले होते. याशिवाय सीपीआयचा एक, शिवसेना तीन तर एक अपक्ष सदस्य विजयी झाला. येथील सरपंचपद हे नागरिकांचा मागास प्रवर्ग सर्वसाधारण प्रवर्गासाठी आरक्षित आहे. राष्ट्रवादीकडे सरपंच पदासाठी दोन उमेदवार पात्र असून, ते दोघेही इच्छुक होते. त्यामुळे सरपंच कोणाला करायचे, असा प्रश्न स्थानिक पुढाऱ्यांसमोर होता. यात शेवटपर्यंत एकमत झाले नाही. अखेर महेश कोळी यांनी ऐनवेळी दुसऱ्या गोटात उडी घेतली. यावेळी सरपंच पदासाठी महेश कोळी व सोनाली निंगुळे यांनी तर उपसरपंच पदासाठी पंकज चव्हाण व धनंजय मोटे यांनी अर्ज दाखल केले होते. यावेळी हात वर करून मतदान करण्यात आले. यामध्ये महेश कोळी व पंकज चव्हाण यांना प्रत्येकी सात मते मिळाल्याने ते विजयी झाले. निवडणूक निर्णय अधिकारी म्हणून व्ही. एस. माचवे यांनी काम पाहिले तर त्यांना ग्रामविकास अधिकारी प्रवीण देशमुख यांनी सहाय्य केले.