आदित्य ठाकरेंनी दिले पाच व्हेंटिलेटर

उस्मानाबाद : पर्यावरण मंत्री आदित्य ठाकरे यांनी उस्मानाबाद व कळंबसाठी पाच व्हेंटिलेटर नुकतेच देऊ केले आहेत. ते जिल्ह्यात दाखल झाले असून, यातील दोन कळंब उपजिल्हा रुग्णालयास तर उस्मानाबाद जिल्हा रुग्णालयास तीन व्हेंटिलेटर खासदार ओम राजेनिंबाळकर यांच्या हस्ते प्रदान करण्यात आले. हे उच्च दर्जाचे व्हेंटिलेटर असल्याने रुग्णांना त्याचा चांगला फायदा होणार असल्याचे मत आमदार कैलास पाटील यांनी शनिवारी व्यक्त केले.

कोरोना महामारीच्या दुसऱ्या लाटेमध्ये बाधित रुग्णांची संख्या मोठ्या प्रमाणात वाढत आहे. त्यातही ऑक्सिजनची आवश्यकता मोठ्या प्रमाणावर भासत आहे. व्हेंटिलेटरचा वापरही मोठ्या प्रमाणात वाढला आहे. रुग्णांना ऑक्सिजन, व्हेंटिलेटर कमी पडू नये, यासाठी सरकार आपली जबाबदारी पार पाडत आहेच. जिल्ह्यात ऑक्सिजन प्लँट सुरु झाले असून, साखर कारखान्याच्या माध्यमातून जिल्ह्यात देशातील पहिला ऑक्सिजन प्रकल्पाचा प्रयोग मुख्यमंत्री उध्दव ठाकरे व सरकारच्या पुढाकाराने यशस्वी झाल्याचे आमदार पाटील म्हणाले. दरम्यान, उस्मानाबाद व कळंब येथील शासकीय रुग्णालयामध्ये व्हेंटीलेटरची आवश्यकता अधिक भासत होती. बाधित रुग्णांना उत्तम प्रकारच्या वैद्यकीय सेवा व उपचार मिळावे, या दृष्टिकोनातून पर्यावरण मंत्री आदित्य ठाकरे यांच्या वतीने पाच व्हेंटिलेटर देण्यात आले आहेत. जिल्हा रुग्णालयासाठी तीन व कळंब उपजिल्हा रुग्णालयासाठी दोन व्हेंटिलेटर मिळाले असून, शिवसेनेकडून आलेले हे व्हेंटिलेटर अत्याधुनिक व नामांकित आहेत. उच्च तंत्रज्ञानाने युक्त व हाताळण्यास अत्यंत सुलभ असलेल्या या आधुनिक व्हेंटिलेटरचा मोठा फायदा दोन्ही रुग्णालयातील रुग्णांना होणार असल्याचे आमदार पाटील यांनी सांगितले. कळंब येथील उपजिल्हा रुग्णालयास शुक्रवारी तर शनिवारी जिल्हा रुग्णालयाच्या प्रशासनाकडे हे व्हेंटिलेटर सुपुर्द करण्यात आल्याचे आ. कैलास पाटील यांनी सांगितले. यावेळी यावेळी नगराध्यक्ष मकरंद राजेनिंबाळकर, कळंबचे तालुकाप्रमुख शिवाजी कापसे, जिल्हा रुग्णालयाचे अतिरिक्त जिल्हा शल्यचिकित्सक डॉ.सचिन देशमुख, डॉ.ईस्माईल मुल्ला उपस्थित होते.