खापा (भंडारा) : कपडे धुन्याकरिता कुटुंबियातील सदस्यांसोबत नाल्यावरील बंधाऱ्यावर गेलेल्या तरुणीच्या अंगावर जिवंत वीज तार पडून तिचा घटनास्थळीच मृत्यू झाला. अंगावर शहारे आणणारी ही घटना तुमसर तालुक्यातील खरबी शेतशिवारात घडली.
चित्रकला निरंजन बडवाईक(१८) असे मृत तरुणीचे नाव आहे. उल्लेखनीय म्हणजे बडवाईक यांच्याकडे १८ मार्च रोजी लग्न समारंभ आहे. ऐनवेळी घडलेल्या या दुःखद घटनेमुळे आनंदावर विरजण पडले आहे. तुमसर तालुक्यातील खरबी येथील रहिवासी असलेले बडवाईक कुटुंबीयांत १८ मार्च रोजी रोजी लग्नसमारंभ आहे. यासंदर्भात घराची स्वच्छता सफेदी व अन्य कार्य सुरू आहे. याच अंतर्गत रविवारी सकाळी बडवाईक कुटुंबियातील सदस्य कपडे धुण्याकरिता खरबी विहीरगाव मार्गावरील शेतशिवार लगतच्या नाल्यावर गेले होते. यावेळी बंधाऱ्याच्या पाळीवर कपडे धूत असताना नाल्यावरून गेलेल्या थ्रीफेज या विद्युत वाहिनीतील एक जिवंत तार कोसळून चित्रकला हिच्या अंगावर कोसळला पाहता पाहताच अवघ्या काही सेकंदातच चित्रकला ही त्या तारासोबत पाण्यात कोसळली. विद्युत च्या जबर धक्क्याने क्षणभरातच चित्रकलेची प्राणज्योत मालविली. होत्याचे नव्हते झाले. आरडाओरड करून सगळी गावकरी नाल्याच्या बंधाऱ्यावर जमली. चित्रकला ही मोहाडी येथील एका महाविद्यालयात बाराव्या वर्गात शिक्षण घेत होती. चित्रकलाच्या मृत्यूने संपूर्ण गावातच शोकमग्न वातावरण निर्माण झाले. तिच्या मागे आई-वडील भाऊ असा मोठा आप्तपरिवार आहे. तिच्या पार्थिवावर खरबी येथील स्मशानभूमीत अंत्यसंस्कार करण्यात आले. या घटनेची मोहाडी पोलिसात नोंद करण्यात आली असून पुढील तपास सुरू आहे.
कुटुंबीयांना २० हजार रुपयांची मदत
सदर घटनेची माहिती तुमसर येथील वीज वितरण कंपनीच्या कार्यालयातील अधिकारी व मोहाडी पोलिस ठाण्याला देण्यात आली. घटनास्थळी मोहाडी पोलिस व वीज वितरण कंपनीचे अधिकारी पोहोचले. पंचनामा करून चित्रकला हिचा मृतदेह शवविच्छेदनासाठी मोहाडी ग्रामीण रुग्णालयात नेण्यात आला. यावेळी वीज वितरण कंपनीतर्फे बडवाईक कुटुंबियांना तात्काळ स्वरूपात २० हजार रुपयांची आर्थिक मदत देण्यात आली. मात्र वीज वितरण कंपनीच्या या निष्काळजीपणामुळे एका तरूणीला नाहक जीव गमवावा लागला याची एकच चर्चा होती.