ठाणे - वागळे इस्टेट परिसरात आपली दहशत माजविण्यासाठी सहा गुंडांनी मिळून एका तरुणाला विवस्त्र करून बेदम मारहाण केली. त्याचा व्हिडिओ देखिल बनविण्यात आला. हाच व्हिडिओ व्हायरल झाल्यानंतर तक्रार दाखल होण्यापूर्वीच यातील आकाश शाहू (22, रा. किसननगर, ठाणे) याला अटक केल्याची तर दुसऱ्याला ताब्यात घेतल्याची माहिती श्रीनगर पोलिसांनी बुधवारी दिली. यातील अन्य चौघांचा अद्यापही शोध घेण्यात येत आहे.
माणुसकीला काळीमा फासणारी ही घटना ठाण्यातील किसननगर भागात अलिकडेच घडली. एका तरुणाला बेदम मारहाण करुन त्याला विवस्त्र करीत त्याचा व्हिडिओ आकाश याच्यासह सहा जणांच्या टोळक्याने बनविला होता. तो व्हिडिओ त्यांनी सोशल मिडियावर व्हायरलही केला. त्याला इतकी बेदम मारहाण करण्यात आली की, आठ दिवस तो घराच्या बाहेरही पडू शकला नाही. त्यामुळे त्याने पोलीस ठाण्यात तक्रारही दाखल केली नाही. मात्र, याच व्हायरल व्हिडिओच्या आधारे वरिष्ठ पोलीस निरीक्षक विजय शिंदे यांच्या पथकाने मारहाण झालेल्या तरुणाचा शोध घेतला. त्याची चौकशी केली असता त्याने संपूर्ण घटनाक्रम सांगितला. 20 जून रोजी हा व्हिडिओ व्हायरल झाला. त्याआधी 13 जून रोजी ही घटना घडली. विकी भोसले या कुख्यात गुंडाची दहशत कायम राहण्यासाठी पूर्ववैमनस्यातून त्याच्या साथीदारांनी या तरुणाला बेदम मारहाण केल्याचे त्याने पोलिसांना सांगितले.
विकीच्या विरोधात असलेल्या सागर रावलसोबत हा मारहाण झालेला तरुण असायचा. याच रागातून हा वचपा काढल्याचे बोलले जाते. मारहाण करणाऱ्या दोघांना पोलिसांनी 22 जून रोजी ताब्यात घेतले आहे. त्यातील एक अल्पवयीन आहे. व्हिडिओमध्ये मारणारी मुले पीडित मुलाला ‘विकी भोसले बॉस आहे’ असे जबरदस्तीने म्हणायला भाग पाडत आहेत. त्याचवेळी त्याला बेदम मारहाणही करीत आहेत. पोलिसांनी आता या प्रकरणांमध्ये दोघांना ताब्यात घेतले आहे. यातील सर्व आरोपींविरुद्ध खूनाचा प्रयत्न केल्याचा गुन्हा दाखल करण्यात आला आहे. विकीविरुद्ध अनेक गुन्हे दाखल असून त्याच्यासह चौघांचा शोध घेण्यात येत असल्याचे पोलिसांनी सांगितले.