मुंबई : एका तरुणाने गांजाची पुडी न दिल्याने लाकडी बांबू व लाथाबुक्यांनी मारहाण करुन त्याची हत्या करण्याची घटना मंगळवारी रात्री कॉटन ग्रीन रेल्वे स्टेशनच्या स्काय वॉक ब्रीजवर घडली. आमीन पटेल (३२) असे मृत तरुणाचे नाव असून एका १७ वर्षीय अल्पवयीन मुलासह राज भारतवाज (१८, रा. चटई चाळ, काळाचौकी) आणि अन्य एका आरोपीला पोलिसांनी ताब्यात घेतले आहे.
नागपाड्यातील सिद्धार्थनगर येथे रहात असलेल्या बंटी कांबळे व त्याचा मित्र आमीन पटेल हे दोघे कॉटन ग्रीन स्टेशनच्या स्कायवॉकजवळ बोलत होते.त्यावेळी बाजूलाच देशी दारुच्या दुकानात दारु पित बसलेल्या तिघांनी आमीनला अडविले. तुझ्या खिशातील गांजाची पुडी दे, अशी मागणी केली, त्यावर त्याने आपल्याकडे नसल्याचे सांगितल्याने त्यांना राग आला. शिवीगाळ करीत लाथाबुक्यानी मारहाण केली. बाजूला असलेला लाकडी बांबू त्याच्या डोक्यात घातल्यानंतर तो रक्तबंबाळ होवून खाली पडल्यानंतर तिघांनी पलायन केले. आमीनला रुग्णालयात नेले असता मृत घोषित करण्यात आले. काळाचौकी पोलिसांनी रात्री शिताफीने तिघाना अटक केली. एकजण अल्पवयीन असल्याने त्याची बालसुधारगृहात रवानगी करण्यात आली. तर दोघांना पोलीस कोठडीत ठेवण्यात आले आहे.