जबलपूर – मध्य प्रदेशातील जबलपूर येथे धक्कादायक घटना समोर आली आहे. याठिकाणी मेव्हण्याने भावजींची निर्घृण हत्या केली आहे. याची माहिती मिळताच बहिणीनेही आत्महत्या केली आहे. हा संपूर्ण प्रकार ऑनर किलिंगचा असल्याचं सांगितलं जात आहे. जबलपूरच्या तिलवारा पोलीस ठाण्याच्या हद्दीत ही घटना घडली आहे.
गुरुवारी सकाळी सर्व पोलीस कर्मचारी आपल्या कामात व्यस्त असतानाच एक युवक हातात कापलेले शिर घेऊन पोलीस ठाण्यात पोहचला हे दृश्य पाहून सर्वांनाच धक्का बसला, आरोपी युवकाने पोलिसांना माहिती दिली की, त्याने बृजेश नावाच्या युवकाची हत्या केली आहे आणि त्याचे शरीर रामनगरा परिसरातील एका शेतात पडल्याचं सांगितले. पोलिसांनी तात्काळ या घटनेतील आरोपीला ताब्यात घेतला आणि घटनास्थळी रवाना झाले.
यावेळी बृजेशचा मृतदेह त्यांना आढळून आला, बृजेशची अत्यंत क्रूर हत्या करण्यात आली होती, त्याच्या डोक्यासह, हाताचेही कुऱ्हाडीने तुकडे करण्यात आले होते, पोलिसांनी मृतदेह ताब्यात घेऊन पोस्टमोर्टमसाठी पाठवला आहे, तर आरोपी धीरज शुक्लाला अटक केली आहे. माहितीनुसार, धीरज आणि बृजेश हे दोघं मित्र होते, दोघं दारूचा व्यवसाय करत होते, परंतु काही महिन्यापूर्वी बृजेश बर्मनसोबत धीरजची बहिण पूजाने पळून जाऊन लग्न केले.
बहिणीला घेऊन पळाल्यामुळे धीरज खूप संतापला होता, त्याने याचा बदला घेण्यासाठी बृजेशची हत्या केली, पोलिसांच्या माहितीनुसार, जवळपास ३ महिन्यानंतर पूजा आणि बृजेश घरी परतले होते, या संधीचा फायदा घेत धीरजने भावजी बृजेशचा काटा काढला, पण ही घटना इथेच संपली नाही तर ज्यावेळी याची माहिती मृत बृजेशची पत्नी पूजाने गळफास घेऊन आत्महत्या केली आहे. यानंतर पोलिसांनी घटनास्थळी धाव घेत पूजाचा मृतदेहही ताब्यात घेतला आणि पोस्टमोर्टमसाठी पाठवला, पूजाचीही हत्या झाली असावी असा अंदाज पोलिसांना आहे, पोलीस या घटनेची सखोल चौकशी करत आहेत. मात्र या संपूर्ण प्रकरानंतर जबलपूरमध्ये खळबळ माजली आहे, ऑनर किलिंगचा हा प्रकार असल्याची चर्चा नागरिकांमध्ये आहे.