पंजाबमध्ये कुटुंबासह आत्महत्येचा धक्कादायक प्रकार घडला आहे. फिरोजपूर जिल्ह्यातील एका व्यक्तीने पत्नीच्या अनैतिक संबंधांना कंटाळून मुलगी, पुतण्या, भावासह कार भरधाव वेगाने नदीत कोसळविली. यामध्ये चौघांचाही मृत्यू झाला असून पोलिसांनी कार आणि मृतदेह बाहेर काढले आहेत. आत्महत्या करण्याचपूर्वीच्या त्याच्या व्हिडीओने खळबळ उडाली आहे.
जसविंदर सिंह याने त्याच्या पत्नीवर अनैतिक संबंधांचे आरोप केले आहेत. कार चालवत असताना त्याने व्हिडीओ बनविला आहे, यात तो रडताना दिसत आहे. धक्कादायक म्हणजे या चौघांनाही आपण आत्महत्या करण्यासाठी जातोय हे माहिती होती. एका फायनान्सरसोबत त्याच्या पत्नीचे अनैतिक संबंध असल्याचे आरोप जसविंदरने केले आहेत. त्याची सासू आणि मेहुणी संसार करायला देत नाहीत, असाही आरोप त्याने केला आहे.
जसविंदरच्या कारमध्ये मोठा भाऊ हरप्रीत सिंह, मुलगी गुरलीन कौर आणि पुतण्या अगम हे होते. घलखुर्द जवळ नदीवर येताच जसविंदरने कार नदीच्या पाण्यात कोसळवली. स्थानिक लोकांच्या कार पाण्यात पडल्याचे लक्षात आले त्यांनी पोलिसांना याची माहिती दिली. पोलिसांनी कार बाहेर काढली तोवर या साऱ्यांचा मृत्यू झाला होता. या व्हिडीओमध्ये मुलांनीही आपल्याला जगायचे नाहीय, असे म्हटले आहे.
जसविंदरच्या भावाने देखील या व्हिडीओत त्याच्या वहिनीबद्दल सांगितले आहे. त्याची वहिनी काला संधू नावाच्या फाय़नान्सरसोबत राहतेय. त्याने तिला वेगळी खोली घेऊन दिली होती. जसविंदरने काला संधूला फोन करून पत्नीला परत पाठविण्याची विनंती केली होती. आईविना मुले अनाथासारखी राहत आहेत, असे म्हटले होते. यावर संधूने रागावून जसविंदरला शिवीगाळ केली होती. गेल्या तीन वर्षांपासून ती संधूसोबत राहत होती.