रामनगरम जिल्ह्यातील अग्रहारा गावातून एक हृदयद्रावक घटना समोर आली आहे. या गावात राहणाऱ्या एका व्यक्तीने पत्नीच्या सततच्या घराबाहेर जाण्याच्या सवयीला कंटाळून आत्महत्या केली आहे. मृताचे नाव गोवर्धन (वय अंदाजे ३२) असून, त्याने आपल्या राहत्या घरात पंख्याला लटकून जीवन संपवले.
समोर आलेल्या माहितीनुसार, गोवर्धनचे लग्न सात वर्षांपूर्वी प्रिया नावाच्या महिलेशी झाले होते. या जोडप्याला दोन मुले देखील आहेत. मात्र, पत्नी प्रिया हिला वाईट सवय होती. गोवर्धनची पत्नी प्रिया त्याला न सांगता किंवा काहीही विचारता वारंवार घराबाहेर जायची. तिच्या या सवयीमुळे गोवर्धन अत्यंत नाराज आणि त्रस्त होता. त्याने अनेकदा तिला समजावण्याचा प्रयत्न केला, परंतु तिचा स्वभाव बदलला नाही. कुटुंबीयांच्या म्हणण्यानुसार, प्रिया एक महिन्यापूर्वीही घराबाहेर गेली होती. या सगळ्याला कंटाळून गोवर्धनने हे टोकाचे पाऊल उचलले.
एकाच इमारतीत राहत होते संपूर्ण कुटुंब
गोवर्धन आपल्या कुटुंबासह एकाच इमारतीत राहत होता. त्याची आई तळमजल्यावर राहत होती, तर गोवर्धन आणि प्रिया तिसऱ्या मजल्यावर राहत होते. पत्नी घराबाहेर गेल्यानंतर गोवर्धन एकटाच त्या घरात राहत होता. ८ जून रोजी गोवर्धनच्या आईने त्याला जेवण आणून दिले. मात्र, गोवर्धनने ते जेवण करण्यापूर्वीच आपले आयुष्य संपवले.
कुटुंबाने दरवाजा उघडला अन्...
९ जून रोजी संध्याकाळपर्यंत गोवर्धन घरातून बाहेर न आल्याने कुटुंबीयांनी त्याच्या घरी जाऊन बघण्याचा विचार केला. घरचा दरवाजा उघडताच तो पंख्याला लटकलेल्या अवस्थेत आढळला. गोवर्धनचा मृतदेह शवविच्छेदनासाठी व्हिक्टोरिया रुग्णालयात पाठवण्यात आला आहे.
प्रिया अजूनही गायब
गोवर्धनच्या कुटुंबीयांनी त्याच्या मृत्यूसाठी त्याची पत्नी प्रियाला जबाबदार धरले आहे. या घटनेमुळे गोवर्धनच्या कुटुंबावर आणि दोन्ही मुलांवर दुःखाचा डोंगर कोसळला आहे. स्थानिक पोलिसांनी या प्रकरणाचा तपास सुरू केला असून, प्रियाचा शोध घेत आहेत.