उत्तर प्रदेशातील संभल जिल्ह्यातून एक धक्कादायक घटना समोर आली आहे. सावत्र बापाने दोन निष्पाप मुलांना खूप त्रास दिला. मुलांना काठीने मारहाणच केली नाही तर तीन दिवस टॉयलेटमध्ये कोंडून ठेवलं. मुलांनी त्यांच्यासोबत घडलेला भयंकर प्रकार पोलिसांसमोर सांगितला आहे. संभल जिल्ह्यातील हयातनगर पोलीस ठाण्याच्या हद्दीत पोलिसांनी सात आणि पाच वर्षांच्या दोन मुलांचा छळ केल्याच्या आरोपावरून सावत्र पित्याविरुद्ध गुन्हा दाखल केला आहे.
संभल जिल्ह्यातील हयात नगर पोलीस स्टेशन हद्दीतील दौलतपुरी गावाशी संबंधित ही घटना आहे. गावातील रहिवासी महेश याने ३ वर्षांपूर्वी मुरादाबाद येथील दोन मुलांची आई रेखा हिच्याशी लग्न केलं होतं. रेखाचं २ महिन्यांपूर्वी निधन झालं. यानंतर सौरभ आणि शौर्य या दोन मुलांच्या संगोपनाची जबाबदारी महेशवर आली. काही दिवस सगळे सुरळीत होतं. मात्र, त्यानंतर सावत्र बापाने दोन्ही निष्पाप मुलांवर अत्याचार करण्यास सुरुवात केली. छोट्या छोट्या गोष्टींमुळे दोन्ही मुलांना घरात राहणं कठीण झालं.
तीन दिवसांपूर्वी सावत्र बाप महेश याने दोन्ही मुलांना काठीने मारहाण केल्याचा आरोप आहे. यानंतर त्यांना टॉयलेटमध्ये कोंडून ठेवण्यात आलं. एवढेच नाही तर त्यांना काही खायला, प्यायलाही दिलं नाही. मुलं रडत रडत त्यांना टॉयलेटच्या बाहेर काढण्याची विनंती करत होते. पण त्यांचं कोणीच ऐकलं नाही. यानंतर शेजारच्या लोकांना हा प्रकार कळताच त्यांनी दोन्ही मुलांना टॉयलेटमधून बाहेर काढलं.
संपूर्ण घटनेची माहिती मुलांच्या आईच्या नातेवाईकांना दिली. माहिती मिळताच मुलांचा मामा तेथे आला आणि दोन्ही मुलांना सोबत घेऊन पोलीस ठाण्यात जाऊन आरोपी महेशविरुद्ध माहिती दिली. त्यानंतर पोलिसांनी आरोपीविरुद्ध गुन्हा दाखल करून त्याला ताब्यात घेतलं. या प्रकरणी अपर पोलीस अधीक्षक श्रीश चंद्र यांनी सांगितलं की, गुन्हा दाखल करण्यात आला असून संपूर्ण प्रकरणाचा तपास सुरू आहे.