शिरूर अनतपाळ (जि. लातूर) : चारित्र्याच्या संशयावरून पत्नीचा खून करून पतीने स्वतः गळफास घेऊन आत्महत्या केल्याची घटना शिरुर अनंतपाळ तालुक्यातील साकोळ येथे शनिवारी रात्री घडली. याबाबत रविवारी शिरूर अनंतपाळ पोलीसांना माहिती मिळताच घटनास्थळी धाव घेत त्यांनी पंचनामा केला.
पोलिसांनी सांगितले, साकोळ येथील सिद्धेश्वर राजेंद्र शिंदे (३५) मनीषा सिद्धेश्वर शिंदे (३२) हे पती-पत्नी कामानिमित्त बाहेरगावी होते. मनिषा काही दिवसांपासून माहेरी राहत होती. सिद्धेश्वर शिंदे याने गोड बोलून पत्नीला रोकडा सावरगाव येथून शनिवारी साकोळ येथे आणले. घरी आल्यावर रात्री दोघांमध्ये वाद झाला, यावेळी सिद्धेश्वर याने पत्नीला लाथा बुक्क्यांनी जोरात मारहाण केली त्यातच तिचा मृत्यू झाला. पत्नीचा मृत्यू झाल्याचे लक्षात येताच त्यानेही स्वत: गळफास घेऊन घरातच आत्महत्या केली. घटना घडली त्यावेळेस घरांमध्ये त्या दोघा व्यतिरिक्त कोणीही नव्हते,त्यामुळे सकाळी बराच वेळ ही घटना इतरांना समजली नाही. शिरूर अनंतपाळ पोलिसांनी घटनेची माहिती मिळताच पोलीस तात्काळ घटनास्थळी दाखल झाले. त्यांनी घटनेचा पंचनामा करून पोलीस ठाण्यात मृत्यूची नोंदही केली आहे. पती, पत्नीच्या मृतदेहाचे प्राथमिक आरोग्य केंद्रात शवविच्छेदन करण्यात आल्यानंतर नोतवाईकांना प्रेत ताब्यात देण्यात आले. याप्रकरणाचा अधिक तपास पोलीस निरीक्षक अंगद सुडके यांच्या मार्गदर्शनात पोलीस उपनिरीक्षक मलय्या स्वामी, तपघाले, तुमकुटे करीत आहेत.
दोन मुले झाली पोरकी...
मयत जोडप्यास दोन मुले आहेत. मोठा मुलगा यश शिंदे (१४) प्रेम शिंदे हा ११ वर्षांचा आहे. आई, वडील दोघांचाही मृत्यू झाल्याने आता ही मुले पोरकी झाली आहे. लहानपणीच आई-वडिलांचे छत्र हरवल्यामुळे सर्वत्र हळहळ केली जात आहे.