टीव्ही अभिनेत्री तुनिषा शर्माने (Tunisha Sharma) शूटिंग सेटवरच गळफास लावून आत्महत्या केल्याने टेलिव्हिजन क्षेत्रात खळबळ माजली आहे. काही तासांपूर्वी सीनसाठी तयार होत असतानाचा व्हिडिओ तुनिषाने सोशल मीडियावर पोस्ट केला होता. मग असे काय झाले की तिने इतके टोकाचे पाऊल उचलले? तुनिषाच्या आईने अभिनेता शिझान खानवर (Sheezan Khan) गंभीर आरोप केले आहे. शिझानला कंटाळून तुनिषाने आत्महत्या केल्याचा आरोप तुनिषाच्या आईने केला आहे. आईच्या तक्रारीवरुन पोलिसांनी गुन्हा दाखल करण्याची प्रक्रिया सुरु केली आहे.
वसई विभागाचे सहाय्यक पोलिस उपायुक्त चंद्रकांत जाधव यांनी सांगितले, ' तुनिषा शर्मा ने शूटिंग दरम्यान सेटवर आत्महत्या केली आहे. आत्महत्येचा एडीआर फॉर्म भरुन तिच्या आईच्या तक्रारीवरुन गुन्हा दाखल करण्याची कारवाई करत आहोत. सहकलाकार शिझान खान सोबत तिचे संबंध होते. यातुनच ती नैराश्यात होती आणि तिने हे टोकाचे पाऊल उचलले. आईच्या फिर्यादीवरुन कारवाई सुरु केली आहे.'
Tunisha Sharma : शिझानच्या मेकअपरुममध्येच तुनिषाने केली आत्महत्या; कोण आहे शिझान खान ?
तुनिषा शनिवारी तिच्या 'अली बाबा: दास्तान-ए-काबुल' या मालिकेच्या शूटिंगसाठी नायगाव येथील सेटवर पोहोचली. तुनिशाचा को-स्टार शिझानच्या म्हणण्यानुसार, तो दुपारी ३ वाजता त्याच्या मेकअप रूमजवळ पोहचला. तेव्हा रुमचा दरवाजा आतून बंद होता. बराच वेळ दार न उघडल्याने त्याने दरवाजा तोडून आत प्रवेश केला. आत तुनिषाचा मृतदेह लटकलेल्या अवस्थेत आढळून आला.