लव्ह मॅरेजचा करुण अंत! बंद खोलीत आढळला दीपिकाचा मृतदेह; लग्नानंतर अवघ्या ९० दिवसांत पतीनेच संपवलं!

प्रेमविवाह करून सुखाचे स्वप्न पाहणाऱ्या एका २९ वर्षीय महिलेचा तिच्या पतीनेच घात केल्याचा धक्कादायक प्रकार उघडकीस आला आहे.

उत्तर प्रदेशातील कानपूर जिल्ह्यातून माणुसकीला काळिमा फासणारी एक घटना समोर आली आहे. प्रेमविवाह करून सुखाचे स्वप्न पाहणाऱ्या एका २९ वर्षीय महिलेचा तिच्या पतीनेच घात केल्याचा धक्कादायक प्रकार उघडकीस आला आहे. रतनपूर भागात राहणाऱ्या दीपिका नावाच्या महिलेची घरगुती वादातून हत्या करण्यात आली असून, घटनेनंतर आरोपी पती शोएब फरार झाला आहे. विशेष म्हणजे लग्नाला अवघ्या तीन महिने उलटले असतानाच हा रक्ताळलेला खेळ खेळला गेल्याने परिसरात तीव्र संताप व्यक्त होत आहे.

लव्ह मॅरेज अन् संशयास्पद मृत्यू 

मृत दीपिकाने ऑक्टोबर २०२५ मध्ये सौरव उर्फ शोएब नावाच्या व्यक्तीशी प्रेमविवाह केला होता. या दोघांचा हा दुसरा विवाह असल्याचे समजते. रतनपूर येथील रामगंगा एन्क्लेव्हमधील एका फ्लॅटमध्ये ते आपल्या ४ वर्षांच्या मुलासह राहत होते. ३ फेब्रुवारीच्या सकाळपासूनच पती-पत्नीमध्ये कोणत्या तरी कारणावरून खटके उडत होते. सायंकाळच्या सुमारास जेव्हा घराचा दरवाजा उघडण्यात आला, तेव्हा आत दीपिकाचा मृतदेह रक्ताच्या थारोळ्यात पडलेला आढळला.

पोलिस येण्यापूर्वीच पती पसार 

घटनेची माहिती मिळताच पनकी पोलीस आणि फॉरेन्सिक टीम घटनास्थळी दाखल झाली. पोलिसांनी दिलेल्या माहितीनुसार, शोएब हा व्यवसायाने ट्रक ड्रायव्हर आहे. सायंकाळी जेव्हा वाद विकोपाला गेला, तेव्हा त्याने दीपिकाची हत्या केली आणि पोलीस पोहोचण्यापूर्वीच तिथून पळ काढला. घराचा दरवाजा आतून बंद होता, जो बळजबरीने तोडावा लागला.

तपासाची चक्रे वेगाने फिरली 

पोलीस उपायुक्त एस. एम. कासिम आबिदी यांनी सांगितले की, "हा अत्यंत गंभीर गुन्हा आहे. मृतदेहाचा पंचनामा करून तो शवविच्छेदनासाठी पाठवण्यात आला आहे. फॉरेन्सिक टीमने घटनास्थळावरून महत्त्वाचे पुरावे गोळा केले आहेत. मृत महिलेच्या आईची चौकशी सुरू असून हत्येचे नेमके कारण लवकरच स्पष्ट होईल."

आरोपीच्या अटकेसाठी पथके रवाना 

शोएबचा शोध घेण्यासाठी पोलिसांनी विशेष पथके तयार केली असून विविध ठिकाणी छापे टाकले जात आहेत. अवघ्या तीन महिन्यांत प्रेमाचा हा असा भयानक शेवट झाल्याने कानपूरमध्ये खळबळ उडाली आहे. संशयाची सुई लव्ह जिहाद किंवा नाव बदलून केलेल्या फसवणुकीकडे तर नाही ना, या दिशेनेही पोलीस तपास करत असल्याची चर्चा स्थानिक स्तरावर सुरू आहे.