मडगाव: कार्निवल मूडमध्ये असलेल्या फातोर्डा आज दुपारी हादरला. भरदुपारी खतरनाक गुंड अन्वर शेख उर्फ टायगर अन्वर याच्यावर गोळीबार करण्याची घटना सर्वांसमोर घडली. या हल्ल्याचे व्हिडीओ त्वरित व्हायरल झाल्याने लोकांमध्येही घबराट पसरली आहे.
या प्रकरणात फातोर्डा पोलिसांनी कुडचडे येथील रिकी होर्णेकर याला अटक केली असून अजून दोघेजण फरार असल्याचे सांगितले जाते. या हल्ल्यात अन्वरच्या मांडीला गोळी लागली असून त्याला गोवा वैद्यकीय महाविद्यालय इस्पितळात दाखल करण्यात आले आहे.
आज दुपारी दीड वाजण्याच्या सुमारास ही घटना घडली. पूर्व वैम्यनस्यातून हा हल्ला झाला असावा असा प्राथमिक अंदाज पोलिसांनी व्यक्त केला आहे. अन्वर आणि रिकी यांच्यात पूर्वीपासून वैम्यनस्य होते. त्यातूनच हा हल्ला झाल्याची शक्यता आहे.
रिकी आणि आणखी तिघेजण मोटारसायकलवरून आले आणि त्यांनी अन्वरवर दोन गोळ्या झाडल्या असे काही प्रत्यक्षदर्शीनी सांगितले. अन्वर हा खतरनाक गुंड असून खंडणी, अपहरण, खुनी हल्ले असे त्याच्यावर अनेक गुन्हे नोंद असून एका वर्षांपूर्वी कुडचडे येथील एका अल्पवयीन मुलीचे अपहरण करून तिच्यावर बलात्कार केल्याच्या आरोपाखाली त्याला अटक केली होती. या अटकेत असतानाच दुसऱ्या आटोपीना धमकी देणारा त्याचा एक व्हिडिओ व्हायरल झाला होता. सध्या तो जामिनावर मुक्त झाला होता.