तीन आरोपींना लाखोंच्या मेफेड्रोनसह अटक; अंमली पदार्थ विरोधी पथकाची कारवाई

पोलिसांनी तिन्ही आरोपीकडून ३६९.४ ग्रॅम एम डी, ३ मोबाईल, २ दुचाकी आणि १ चार चाकी असा एकूण ८४ लाख ३० हजारांचा मुद्देमाल मिळून आला आहे.

मंगेश कराळे

नालासोपारा - अंमली पदार्थ विरोधी कक्षाच्या पोलिसांनी पेल्हार पोलीस ठाण्याच्या हद्दीत ३६९.४ ग्रॅम वजनाच्या मेफेड्रोन या अंमली पदार्थ विक्रीकरीता जवळ बाळगणाऱ्या तीन आरोपींना गुरुवारी रात्री पकडले आहे. दररोज नालासोपारा शहरात अंमली पदार्थ मिळत असल्याने आश्चर्य व्यक्त केले जात आहे.

पोलीस आयुक्तालयाच्या अंतर्गत अंमली पदार्थ विरोधी कक्षाचे पोलीस गुरुवारी रात्री तुळींज आणि धानिवबाग परिसरात अंमली पदार्थ खरेदी विक्री करणाऱ्या आरोपींवर कारवाई करण्यासाठी गस्त घालत होते. अंमली विरोधी पथकाचे पोलीस पेल्हार पोलीस ठाण्याच्या कार्यक्षेत्रातील धानिवबाग तलाव ते गावदेवी मंदिरकडे जाणाऱ्या रोडवर असलेल्या रेल्वे ब्रिज खाली  तीन संशयित विश्वजित चौहान, नवास शेख आणि सूरज पडा हे आढळून आले. त्यांची पंचांसमक्ष अंग झडती घेतली असता विश्वजित चौहान याच्याकडे ३९ लाख रुपये किंमतीचे १९५.१ ग्रॅम, नवास शेख याच्याकडे २२ लाख ४० हजार रुपये किंमतीचे १११.५ ग्रॅम आणि सूरज पडा याच्याकडे १२ लाख ६० हजारांचे ६२.८ ग्रॅम एमडी (मेफेड्रोन) अंमली पदार्थ मिळून आला आहे. पोलिसांनी तिन्ही आरोपीकडून ३६९.४ ग्रॅम एम डी, ३ मोबाईल, २ दुचाकी आणि १ चार चाकी असा एकूण ८४ लाख ३० हजारांचा मुद्देमाल मिळून आला आहे. सदर मुद्देमाल जप्त करून पेल्हार पोलिस ठाण्यात गुन्हा दाखल करण्यात आला आहे.

सदरची कारवाई पोलीस उपायुक्त अविनाश अंबुरे, सहायक पोलीस आयुक्त मदन बल्लाळ यांचे मार्गदर्शनाखाली अंमली पदार्थ विरोधी कक्षाचे प्रभारी पोलीस निरीक्षक सचिन कांबळे. पोलीस उपनिरीक्षक संतोष घाडगे व पाठक, पोलीस हवालदार इंगळे, टक्के, पाटील, आव्हाड, पागधरे, घेरे यांनी केली आहे.