भोपाळ - मध्य प्रदेशमधील मुरैना येथून एक धक्कादायक प्रकार समोर आला आहे. येथे एका पत्नीने तिच्या पतीचा काटा काढण्यासाठी एखाद्या क्राईम स्टोरीला लाजवेल असा कट रचला. त्यानंतर संपूर्ण कुटुंबाच्या डोळ्यात जवळपास दोन वर्षे धूळफेक केली. मात्र एका चुकीने तिच्या सगळ्या कारस्थानाची पोलखोल झाली. या पत्नीने प्रियकराच्या मदतीने पतीची अत्यंत क्रूरपणे हत्या केली. त्यासाठी त्यांनी असा मार्ग अवलंबला की ज्यामुळे कुणालाही फारसा संशल आला नाही. या महिलेने प्रथम पतीला झोपेच्या गोळ्या खाऊ घालून बेशुद्ध केले. त्यानंतर त्याचे कपडे काढून त्यांना जिवंत वाहत्या पाण्यात सोडले. पोलिसांनी हा मृतदेह जप्त केला. मात्र बेवारस समजून तो दफन केला.
त्यानंतर पत्नीने चालाखी करत आपला पती म्हणून जवळपास २२ महिने प्रियकराला सासूशी बोलायला लावले. तसेच आपले पती कुठेतरी दूर काम करण्यासाठी गेले आहेत, असे तिने सासूला सांगितले. मात्र पत्नीच्या एका चुकीमुळे तिचं बिंग फुटलं. झालं असं की, तिने तिच्या नणंदेसोबत प्रियकराला बोलायला लावले. मात्र तो आवाज आपल्या भावाचा नाही, हे तिने अचूक ओळखले. त्यानंतर ती तिच्या आईला घेऊन थेट पोलिसांकडे गेली. तसेच भाऊ बेपत्ता असल्याची तक्रार दिली. दरम्यान, पोलिसांनी तपास केला असता पत्नी आणि तिच्या प्रियकराने केलेले कुकृत्य उघडकीस आले.
हे संपूर्ण प्रकरण सिंहौनियाजवळच्या एका गावात घडले आहे. गावातील विश्वनाथ नावाचा तरुण वृद्ध आई आणि पत्नीसोबत राहत होता. त्याची बहीण शेजारच्या गावात राहते. यादरम्यान, विश्वनाथच्या पत्नीचं प्रेमप्रकरण हे त्यांच्या शेतात राहणाऱ्या एका तरुणासोबत सुरू झालं. विश्वनाथच्या आईला दिसत नसे, तसेच ऐकू येत नसे. याचा फायदा घेऊन सदर महिला प्रियकराला नेहमी भेटायला बोलवायची. मात्र विश्वनाथ असेपर्यंत आपलाल्या एक होता येणार नाही याची खात्री पटल्याने त्यांनी त्याला मार्गातून हटवण्याची योजना आखली.
२३ नोव्हेंबर २०२० रोजी पत्नी पतीला सामान खरेदी करण्याच्या बहाण्याने घेऊन गेली. त्यानंतर त्याला झोपेच्या गोळ्या खाऊ घालून बेशुद्ध केले. त्यानंतर त्याचे कपडे काढले आणि त्याला जिवंतच कालव्यात सोडले. दुसऱ्या दिवशी सासू विचारू लागली तेव्हा तो कामासाठी गुजरातला गेल्याचे सांगितले. तसेच तिने सासर सोडून ती प्रियकरासोबत मुरैना येथे राहू लागली. जेव्हा पतीची आई मुलाबाबत विचारायची तेव्हा ती प्रियकरासोबत तिचं बोलणं घडवून आणायची. मात्र नणंदेसोबत त्याला बोलायला लावण्याची चूक तिने केली आणि तिचं सगळं बिंग फुटलं.