राजस्थानातील प्रसिद्ध आध्यात्मिक व्यक्तिमत्व साध्वी प्रेम बाईसा यांच्या संशयास्पद मृत्यू प्रकरणाने आता वेगळे वळण घेतले आहे. मृत्यू होऊन अनेक दिवस उलटले तरी अद्याप ठोस कारण समोर न आल्याने, विशेष तपास पथकाने रविवारी बोरानाडा येथील त्यांच्या आश्रमावर छापा टाकला. पोलीस आयुक्त ओमप्रकाश पासवान आणि एसीपी छवी शर्मा यांच्या उपस्थितीत आश्रमातील पुरावे गोळा करण्यात आले असून, तपासासाठी आश्रमाचा काही भाग सील करण्यात आला आहे.
तीन तास कसून चौकशी आणि सीन रिक्रिएशन
रविवारी एसआयटीने साध्वींचे वडील विरमनाथ आणि त्यांच्या ड्रायव्हरची तब्बल तीन तास उलटतपासणी केली. ज्या रात्री ही घटना घडली, तेव्हा नेमके काय झाले होते, हे समजून घेण्यासाठी पोलिसांनी घटनास्थळावर सीन रिक्रिएट केला. ड्रायव्हर सुरेशने दिलेल्या जबानीत साध्वींना उलट्या झाल्याचे सांगितले होते, तर वडिलांनी त्यांना श्वास घ्यायला त्रास होत असल्याचे म्हटले होते. या परस्परविरोधी विधानांमुळे पोलिसांचा संशय बळावला आहे.
मृत्यूच्या तीन थिअरीज: अन्न, विष की इंजेक्शन?
पोस्टमॉर्टम रिपोर्टमध्ये मृत्यूचे अंतिम कारण स्पष्ट न झाल्याने पोलीस तीन वेगवेगळ्या दिशांनी तपास करत आहेत.
पहिली थिअरी: जेवताना अन्न घशात अडकल्यामुळे श्वास गुदमरून मृत्यू झाला का?
दुसरी थिअरी: त्यांना धीम्या गतीने विष देण्यात आले होते का?
तिसरी थिअरी: एखाद्या घातक इंजेक्शनच्या संसर्गामुळे त्यांचा जीव गेला का?
वडील संशयाच्या भोवऱ्यात?
साध्वींचे वडील विरमनाथ यांची चौकशी केल्यानंतर त्यांना पुन्हा एसीपी कार्यालयात बोलावण्यात आले. त्यांच्या सुरक्षेच्या नावाखाली पोलीस त्यांच्या हालचालींवर बारीक लक्ष ठेवून आहेत. नर्सिंग कर्मचारी देवीसिंह याच्या भूमिकेबाबतही पोलीस सध्या माहिती गोळा करत आहेत. आश्रमातील लोकांकडून मिळालेल्या काही नवीन माहितीची पडताळणी सध्या एफएसएल टीमकडून केली जात आहे.
"आम्ही प्रत्येक पुराव्याची बारकाईने तपासणी करत आहोत. वडिलांकडून आणि कर्मचाऱ्यांकडून मिळालेल्या माहितीची शहानिशा सुरू आहे. सध्या तपासाबाबत कोणतीही अंतिम प्रतिक्रिया देणे घाईचे ठरेल," असे एसीपी छवी शर्मा यांनी प्रसारमाध्यमांशी बोलताना सांगितले.
Web Summary : Sadhavi Prem Baisa's death remains a mystery. SIT recreated the ashram scene and questioned her father and driver due to conflicting statements. Theories explored include food obstruction, poisoning, or lethal injection. Police are investigating all angles.
Web Summary : साध्वी प्रेम बाईसा की मौत एक रहस्य बनी हुई है। एसआईटी ने आश्रम के दृश्य को फिर से बनाया और विरोधाभासी बयानों के कारण उसके पिता और ड्राइवर से पूछताछ की। सिद्धांतों में भोजन का अवरोध, जहर या घातक इंजेक्शन शामिल हैं। पुलिस सभी कोणों से जांच कर रही है।