संदीप झीरवाळ, लोकमत न्यूज नेटवर्क, नाशिक: दारू पिण्यासाठी पैसे दिले नाही याकारणावरून कुरापत काढून चौघा संशयितांनी युवकाच्या डोक्यात धारदार शस्त्राने वार करून जिवे ठार मारण्याचा प्रयत्न केल्याची घटना गेल्या सोमवारी (दि.२२) मध्यरात्री घडली होती. या मारहाण प्रकरणी पंचवटी पोलिसांनी चौघा संशयितांना अटक केली आहे.
पंचवटी राजवाडा येथे राहणाऱ्या रामचंद्र हरिभाऊ पगारे (६४) यांनी पंचवटी पोलिस ठाण्यात तक्रार दाखल केली होती. त्यानुसार सोमवारी (दि.२२) मध्यरात्री राजवाडा परिसरात राहणाऱ्या संशयित आरोपी स्वप्निल उनवणे, देवेश कांबळे, टक्या ऊर्फ विक्रांत नेटावटे व विकी नेटावटे आदींनी राजवाडा येथे राहणाऱ्या अभय रामचंद्र पगारे घरासमोर असताना संशयित आरोपी त्या ठिकाणी आले व त्यांनी दारू पिण्यासाठी पैशांची मागणी केली. त्यावेळी पगारे याने पैसे देण्यास नकार दिल्याने संशयितांनी वाद घालून त्याला शिवीगाळ करीत हातातील धारदार शस्त्राने डोक्यावर वार करून जिवे ठार मारण्याचा प्रयत्न केला होता. या घटनेनंतर पोलिसांनी एकाला अटक केली होती तर उर्वरित संशयित फरार झाले होते. आता या प्रकरणात पोलिसांनी सर्व संशयितांना अटक केली असून पोलिस पुढील तपास करीत आहेत.