मीरारोड - मूळच्या गुजरातच्या २२ वर्षीय तरुणीने मैत्रिणीचे असलेले विवाहबाह्य संबंध मैत्रिणीच्या पतीस सांगितले म्हणून मैत्रिणीने प्रियकरासोबत मिळून त्या तरुणीचे फोटो व भ्रमणध्वनी क्रमांक डेटिंग वेबसाईटवर टाकले. त्यावरून तिला अश्लिल कॉल येऊ लागल्याने भाईंदरच्या नवघर पोलिसांनी मैत्रीण व तिच्या प्रियकरा विरुद्ध गुन्हा दाखल केला आहे.
गुजरातच्या राजकोट येथील न्यू महावीर नगर मध्ये राहणारी मेघा सोमपुरा हि ब्युटिशियन चे काम करते. कामा निमित्त भाईंदर पूर्वेस राहणाऱ्या तसेच लग्न आदी इव्हेंट काम करणाऱ्या एका विवाहिते सोबत जानेवारी महिन्यात तिची ओळख झाली व त्यातून दोघींची मैत्री झाली. विवाहितेच्या ठाणे - घोडबंदर मार्गावरील पुराणिक सिटी मधील भाड्याच्या घरात मेघा राहू लागली. विवाहिता हि त्या भाड्याच्या घरी दिवसा येत असे. तिचे विरारच्या चंदनसार येथे राहणाऱ्या आशिष राठोड सोबत विवाहबाह्य संबध होते. ठाण्याच्या घरात विवाहित व आशिष वारंवार येत असत. मेघा राजकोटला घरी गेली व फेब्रुवारी मध्ये परत आली असता ठाण्याचे भाड्याचे घर रिकामी केल्याचे तिला समजले. त्या विवाहितेने मेघाची तिच्या पती सोबत भाईंदर येथील घरी ओळख करून दिली होती.
विवाहिता व आशिष सोबत राजस्थान येथे फिरून आल्या नंतर मेघा भाईंदर येथेच राहू लागली. कामासाठी ती गोवा येथे गेली असताना विवाहितेच्या पतीने तिला कॉल करून पत्नीचे आशिषसोबत अनैतिक संबंध असल्या बाबत विचारणा केली. त्यास मेघा हिने दुजोरा दिला. त्यामुळे विवाहितेच्या घरात वादंग झाला. त्याचा राग येऊन विवाहिता व आशिष हे मेघाला कॉल करून तसेच संदेश पाठवून शिवीगाळ करत धमकावू लागले. तुझे फोटो आता पॉर्न वेबसाईटवर टाकुन आयुष्यातुन उठवुन टाकणार अशी धमकी देऊ लागले.
तोच ७ एप्रिल रोजी एका अनोळखी व्यक्तीने कॉल करून शरीरसंबंधाबाबत विचारणा केली. तिचा मोबाईल व फोटो हे लोकेंटो नावाच्या संकेतस्थळावर मिळाल्याची व त्यावर दराची रक्कम टाकलेली असल्याची माहिती त्या अनोळखी इसमाने मेघास दिली. तसेच त्या संकेतस्थळाचे स्क्रिनशॉट सुद्धा तिला पाठवले. त्याची मेघा हिने सोमवारी नवघर पोलीस ठाण्यात फिर्याद दिल्यावर पोलिसांनी गुन्हा दाखल केला आहे.