यवतमाळ : जिल्ह्यातील महागाव येथील जुन्या वस्तीत एका विवाहितेने गळफास लावून आत्महत्या केली. तिच्या मृत्यूनंतर पतीनेही विष प्राशन करून आत्महत्येचा प्रयत्न केला. या थरारक घटनेने शहरात एकच खळबळ उडाली आहे.
कांचन अवधूत देवसरकर (वय २७) असे मृत विवाहितेचे नाव आहे. तिचा पती अवधूत रंगराव देवसरकर याची प्रकृती चिंताजनक असून त्याला पुसद येथे रुग्णालयात दाखल करण्यात आले आहे. शिरड ता. हदगाव जि. नांदेड येथील नामदेव जाधव यांची कन्या कांचन हिचा सात वर्षापूर्वी येथील अवधूत देवसरकर यांच्यासोबत विवाह झाला होता. या दाम्पत्याला श्रृती आणि श्रावणी अशा दोन गोंडस मुली आहे. मात्र क्षुल्लक वादातून घरात नेहमी सासू आणि सुनेत वाद होत होते. या वादाला कंटाळून बुधवारी दुपारी २ वाजताच्या सुमारास घरात कुणीच नसताना कांचनने ओढणीने गळफास लावून आत्महत्या केली.
ही घटना उघडकीस येताच घरात प्रचंड तणाव निर्माण झाला. पत्नीच्या आत्महत्येचा धक्का सहन न झाल्याने पती अवधूत देवसरकर याने लगेच शेतात जाऊन कीटकनाशक प्राशन करून आत्महत्येचा प्रयत्न केला. ही बाब लक्षात येताच लगेच त्यांना उपचारासाठी पुसद येथे रवाना करण्यात आले. या घटनेची माहिती मिळताच कांचनच्या माहेरच्यांनी महागावकडे धाव घेतली. सायंकाळी उशिरापर्यंत याप्रकरणी पोलीस कारवाई सुरूच होती.