गोव्यातील एका हॉटेलमध्ये आपल्या चार वर्षांच्या मुलाची हत्या केल्याचा आरोप असलेल्या सूचना सेठबाबत आणखी एक मोठा खुलासा समोर आला आहे. बंगळुरुतील कंपनीच्या सीईओ सूचना सेठ आपल्या मुलासोबत राहत असलेल्या अपार्टमेंटमधून पोलिसांना हाताने लिहिलेलं एक पत्र सापडलं आहे. या पत्रावरूनच हत्येमागचं कारण समजलं आहे. गोवा पोलिसांनी दिलेल्या माहितीनुसार, सूचना सेठ राहत असलेल्या सर्व्हिस अपार्टमेंटमधून त्यांना एक पत्र मिळालं आहे. माझ्या पतीने मुलाला भेटण्याचा न्यायालयाने दिलेला आदेश मी सहन करू शकत नाही असं पत्रात म्हटलं आहे.
इंडिया टुडेच्या वृत्तानुसार, गोवा पोलिसांनी पत्र सील करून हँडरायटिंग एक्सपर्टच्या तपासासाठी फॉरेंसिक सायन्स लेबोरेटरीला पाठवलं आहे. यानंतर पोलिसांनी हत्येचे गूढ उकलण्यास सुरुवात केली. सूचना सेठवर आपल्या चार वर्षांच्या मुलाची हत्या केल्याचा आरोप आहे. न्यायालयाच्या आदेशानंतर आपल्या पतीने आपल्या मुलाला भेटू नये असं तिला वाटत होतं. इतकेच नाही तर सुत्रांनी असा दावाही केला आहे की मुलाच्या चेहऱ्यावरून सूचनाला तिच्या पतीसोबतच्या नातेसंबंधाची आठवण व्हायची, म्हणून तिने मुलाची हत्या केली.
2010 मध्ये सूचनाचं लग्न झालं. ती बंगळुरूमध्ये तिच्या पतीला भेटली. त्यांच्या घटस्फोटाची प्रक्रिया सुरू आहे. पतीला दर रविवारी आपल्या मुलाला भेटण्याची परवानगी देण्याच्या न्यायालयाच्या आदेशावर ती नाराज होती. तिने 2022 मध्ये पती वेंकटरमन विरुद्ध घरगुती हिंसाचाराचा गुन्हा देखील दाखल केला होता. यामुळे, या प्रकरणातील न्यायालयीन कागदपत्रांवरून असे दिसून आले आहे की तिने वेंकटरमन यांचे महिन्याचे नऊ लाख रुपये उत्पन्न सांगून दरमहा अडीच लाख रुपयांची मागणी केली होती.
सूचना सेठने तिच्या मित्रांना आणि कुटुंबातील सदस्यांना सांगितलं की, तिचा मुलगा तिच्या नवऱ्यासारखा दिसतो आणि तो नेहमी तिला ते दोघं वेगळे झालेल्या नात्याची आठवण करून देत असे. यामुळे तिने आपल्या मुलाची हत्या केली. स्टार्टअपच्या चार वर्षांच्या मुलाची हत्या केल्याचा आरोप असलेल्या सूचनाच्या खोलीतून गोवा पोलिसांना खोकल्याच्या सिरपच्या दोन रिकाम्या बाटल्या सापडल्या. औषधाच्या बाटल्या सापडल्याने आरोपीने गुन्ह्यापूर्वी मुलाला औषधाचे हेवी डोस दिले असावेत आणि कट रचल्याचं समोर येत आहे.