कल्याण : डोंबिवली पश्चिमेकडील जुनी डोंबिवली परिसरात राहणारे एका इसमाने घर सोडून जाणाऱ्या पत्नीच्या डोक्यात हातोड्याने घाव घालून तिला गंभीर जखमी केले आहे. इतकेच नाही तर यानंतर या इसमाने थेट मालगाडीखाली आत्महत्या केल्याची धक्कादायक घटना घडली आहे. दरम्यान दारूच्या आहारी गेलेल्या पतीकडून सुरु असलेली दररोजची मारहाण असह्य झाल्याने पत्नी घर सोडून चालली होती.
काजल (39) आणि राज अगरवाल हे दाम्पत्य आपल्या दोन मुले आणि राज याच्या पित्यासह जुनी डोंबिवली परिसरातील लक्ष्मी निवास या इमारतीत राहते. राज इस्टेट एजंटचे काम करतो. तर काजल ब्युटीपार्लर चालवून आपल्या कुटुंबाचा उदरनिर्वाह करते. मात्र काही दिवसांपासून राज याचे दारूचे व्यसन वाढले होते.
सतत दारू पिऊन घरी आल्यानंतर शिवीगाळ आणि मारहाण करत असल्याने पती-पत्नीमध्ये भांडणे वाढली होती. त्यामुळे त्रासलेल्या काजलने राज याच्याविरोधात विष्णूनगर पोलिस ठाण्यात तक्रार दाखल केली होती. काजल ही आपले सामान घेण्यासाठी पतीच्या घरी आली असता राजने तिच्यावर जीवघेणा हल्ला केला. त्यानंतर घरातून निघून गेलेल्या राज याने रागाच्या भरात भिवंडी येथील खारगाव-वसई मार्गावर मालगाडी खाली झोकून आत्महत्या केल्याचे विष्णूनगर पोलिसांनी सांगितले.