नागपूर : बेलतरोडी येथील एका हॉटेलमध्ये सुरू असलेल्या सेक्स रॅकेटचा पोलिसांनी भंडाफोड केला आहे. पोलिसांनी पाच आरोपींना अटक केली आहे. गुन्हे शाखेच्या सामाजिक सुरक्षा पथकाने ही कारवाई केली आहे.
सामाजिक सुरक्षा विभागाच्या पथकाला हॉटेल ओयो सिसॉर्ट, स्टे इन (मेश्राम ले आउट, बेलतरोडी रोड) येथे देहव्यापार सुरू असल्याची माहिती मिळाली. पोलिसांनी सापळा रचला व बनावट ग्राहक पाठविला. त्याने इशारा देताच पोलिसांनी धाड टाकली. तेथून एक महिलेची सुटका करण्यात आली. पोलिसांनी हॉटेल मालक सुरज गजानन निकम ( ३६, हुडकेश्वर), मॅनेजर बीओम कैलास पटेल (३० वर्षे,पिपरीया, जि. होशंगाबाद, म.प्र.) यांच्यासह दलाल अविनाशकुमार लक्ष्मण पांडे (२४, झारखंड), रॉकी राजेंद्र अग्रवाल ( ३०, मनिष नगर, बेलतरोडी), आशिषकुमार नागदेव यादव ( २७, बेलतरोडी) व नितीनकुमार रोहितास पांडे (२४, जयप्रकाश नगर) यांना ताब्यात घेतले.
आरोपी गरीब मुली, महिलांना पैशांचे आमीष दाखवत देहव्यापार करवून घेता होते. त्यांच्या ताब्यातून ८ मोबाईल, कारसह १७,३७,००० रुपयांचा मुद्देमाल जप्त करण्यात आला. पोलीस निरीक्षक ललिता तोडासे, महेंद्र थोटे, लक्ष्मण चौरे, शेषराव राऊत, अश्विन मांगे, समिर शेख, कुणाल मसराम, कमलेश क्षीरसागर, आरती चव्हाण, पुनम शेंडे यांच्या पथकाने ही कारवाई केली.