शिवसेना राज्यसभा खासदार संजय राऊत यांना ईडीने मध्यरात्री अटक केली आहे. सकाळी सात वाजल्यापासून रात्री बारा वाजेपर्यंत चाललेल्या चौकशीत राऊत हे ईडीला सहकार्य करत नव्हते. यामुळे त्यांना अटक करण्यात आल्याचे ईडीच्या अधिकाऱ्यांनी सांगितले.
राऊत यांच्या घरी ईडीचे अधिकारी रविवारी सकाळी सात वाजताच दाखल झाले होते. त्यांनी सोबत पोलिसांचा आणलेला फौजफाटा पाहता राऊत यांना ताब्यात घेणार असल्याचे संकेत मिळत होते. मैत्री बंगल्यावर सकाळी सात ते सायंकाळी ४ वाजेपर्यंत चौकशी करण्यात आली. यानंतर राऊत यांना ईडीने बलार्ड एस्टेट येथील ईडीच्या कार्यालयात नेले. तिथेही रात्री उशिरा पर्यंत चौकशी करण्यात आली. या चौकशीत राऊत सहकार्य करत नसल्याने त्यांना पीएमएलए कायद्यानुसार अटक करण्यात आल्याचे या अधिकाऱ्यांनी सांगितले.
राऊत यांना आज मुंबईतील विशेष पीएमएलए कोर्टात हजर केले जाणार आहे. ईडी त्यांची कोठडी मागणार आहे. ईडीच्या अधिकाऱ्यांसोबत कारवाईवेळी केंद्रीय औद्योगिक सुरक्षा दलाचे (सीआयएसएफ) कर्मचारी होते.
दिवसभरात काय घडलं?भाजपा नेते किरीट सोमय्या यांनी संजय राऊत यांच्यावर भ्रष्टाचाराचे आणि आर्थिक घोटाळ्याचे आरोप केले होते. या प्रकरणी चौकशीसाठी संजय राऊत यांना ईडीने चार वेळा समन्स बजावले होते. त्यांपैकी केवळ एकदाच ते चौकशीसाठी हजर राहिले. तीन वेळा ते गैरहजेर राहिल्यानंतर आज अखेर ईडीचे पथक थेट संजय राऊत यांच्या घरी दाखल झाले. संजय राऊत यांच्या भांडुप येथील घरी ईडीच्या पथकाने झाडाझडती घेतली आणि त्यांची साडे नऊ तास चौकशी केली. त्यांची पत्नी वर्षा राऊत यांचीही चौकशी करण्यात आली. मात्र तपासात सहाकार्य करत नसल्याचा ठपका ठेवत ईडीचे अधिकारी संजय राऊतांना मुंबईतील ईडी कार्यालयात घेऊन गेले. त्यानंतर तेथेही त्यांची सुमारे ८ तास चौकशी करण्यात आली आणि अखेरीस त्यांना अटक केल्याची बातमी मिळाली.
संजय राऊतांना भाजपा घाबरली; बंधू सुनील राऊतांची प्रतिक्रियासंजय राऊत यांना अटक केल्यानंतर सुनील राऊतांनी प्रतिक्रिया दिली. "भारतीय जनता पार्टी संजय राऊतांना घाबरली. संजय राऊतांना बोगस केस बनवून अटक करण्यात आली आहे. त्यांची उद्या सकाळी वैद्यकीय चाचणी केली जाणार आहे. त्यानंतर त्यांना कोर्टात हजर करण्यात येईल. पण संजय राऊतांना चुकीच्या आरोपांखाली अडकवण्यात आले आहे. आम्ही न्यायायलात नक्कीच लढा देऊ. गोरेगांव च्या पत्राचाळ प्रकरणाचे आरोप करून त्यांना अटक करण्यात आलेली नाही. त्यामुळे आम्ही नक्कीच या विरोधात आवाज उठवू", अशी माहिती बंधू सुनील राऊत यांनी दिली.