मुंबईमधून एक धक्कादायक बातमी येत आहे. एका मेक्सिकन महिला डीजेवर बलात्कार झाल्याचा प्रकार घडला आहे. या परदेशी महिलेचा लैंगिक छळ करणाऱ्या स्लिक एंटरटेनमेंटच्या ३६ वर्षीय मालकाला मुंबई पोलिसांनी अटक केली आहे.
स्लिक एंटरटेनमेंट ही म्युझिक इव्हेंट कंपनी आहे. या आरोपीने पीडितेला तिचे करिअर उध्वस्त करण्याचीही धमकी दिली होती. आरोपीचे नाव प्रतिक पांडे असे आहे. प्रतिक हा डान्स म्युझिक कार्यक्रम आयोजित करतो. पीडित महिला ही ३१ वर्षांची आहे. पांडेचे २०२० मध्ये लग्न झालेले आहे. त्याने महिलेचे लैंगिक शोषण केले आणि तिच्याकडे मदत मागितली होती.
पीडितेवर कोलकाता, बेंगळुरू, इंदूर आणि आंतरराष्ट्रीय संगीत महोत्सव, टुमॉरोलँड येथे अनेक वेळा बलात्कार करण्यात आला. आरोपी गुन्हेगारी पार्श्वभूमीचा आहे, असे पीडितेचे वकील अरबाज पठाण यांनी सांगितले. पांडेने पीडितेच्या पुरुष मित्राला जीवे मारण्याची धमकीही दिली होती. आरोपी तिला ओरल सेक्स करण्यास भाग पाडत असे, तसेच तिचे आक्षेपार्ह फोटो काढून अश्लील व धमकीचे संदेश पाठवत असायचा, असे वकिलांनी सांगितले.
पीडिता मॉडेल बनण्यासाठी मुंबईत आली होती. पांडेने तिला २०१९ मध्ये पहिल्यांदा अश्लिल जोक पाठविले होते. आरोपीने काम देण्याच्या बहाण्याने वांद्र्यातील त्याच्या घरी महिलेवर पहिल्यांदा जबरदस्ती केली होती. काम देण्याच्या बदल्यात त्याने तिचा लैंगिक छळ केला होता. तसेच चालत्या ऑटोमध्ये तो तिचा हात धरायचा आणि त्याच्या प्रायव्हेट पार्टला हात लावण्यास सांगायचा, असा आरोप पीडितेने केला आहे.
वांद्रे पोलिस ठाण्यात आरोपीविरुद्ध बलात्कार, अनैसर्गिक लैंगिक संबंध, गुन्हेगारी धमकी, लैंगिक छळ, पाठलाग आणि माहिती तंत्रज्ञान कायद्याच्या कलमांखाली गुन्हा दाखल केला आहे. न्यायालयाने प्रतिक पांडेला 2 डिसेंबरपर्यंत पोलीस कोठडी सुनावली आहे.