नागपूर – महाराष्ट्रातील नागपूर इथं धक्कादायक प्रकरण समोर आलं आहे. याठिकाणी घरात एकटी असताना २४ वर्षीय मुलीनं यूट्यूब व्हिडीओ पाहून स्वत:चं अबॉर्शन केल्याचं उघड झालं आहे. या खळबळजनक प्रकाराचा खुलासा झाल्यानंतर पीडित युवतीनं प्रियकर सोहेल वहाब खान याच्यावर अनेक गंभीर आरोप लावले आहे. या घटनेची माहिती मिळताच पोलिसही हैराण झालेत.
६ वर्षापासून बलात्काराचा सिलसिला
नागपूरच्या एक कॉलनीतील रहिवासी असलेल्या युवतीनं सांगितले की, प्रियकर सोहेलने २०१६ पासून लग्नाचं आमिष दाखवून तिच्यासोबत लैंगिक संबंध ठेवत होता. रिपोर्टनुसार, आरोपी सोहेल या युवतीला नेहमी बाहेर फिरण्यासाठी घेऊन जात होता. ५० पेक्षा अधिकवेळा युवतीवर बलात्कार झाल्याचा तिचा दावा आहे. दोघांमध्ये सुरु असलेल्या प्रेमसंबंधांबाबत युवतीच्या घरच्यांनाही माहिती होती. प्रियकर घरच्यांनाही फसवणूक करत नेहमी लग्नाची बोलणी पुढे ढकलायचा असा आरोप युवतीने केला आहे.
प्रियकराचा अजब सल्ला
पीडिताने दावा केला की, सोहेलने तिला अबॉर्शन करण्यासाठी मजबूर केले. कारण त्याचं यापूर्वीच लग्न झालं होतं आणि तो एका मुलाचा बाप होता. सोहेलनेच यूट्यूब पाहून अबॉर्शन करण्याची प्रोसेस फॉलो करण्यास सांगितले. सेल्फ अबॉर्शनसाठी महिलेने घरातील किचनमध्ये वापरण्यात येणाऱ्या साहित्याचा वापर केला. त्याप्रकारे तिने गर्भनाळ कापून स्वत:चा जीव धोक्यात घातला.
कसा घडला प्रकार?
युवती ७ महिन्याची गर्भवती होती. त्यावेळी अचानक खाली कोसळल्याने तिला प्रचंड वेदना होऊ लागल्या. त्यामुळे वेळेआधीच डिलिव्हरी होऊ लागली. आरोपी सोहेलने युवतीला सांगितले की, व्हिडीओ पाहून अबॉर्शन करून घे. युवतीने यूट्यूबवर व्हिडीओ पाहून मुलाला जन्म दिला परंतु तो जिवंत नव्हता. त्यानंतर घटनास्थळी पोहचलेल्या सोहेलने युवतीला समजावून नवजात मुलाचा मृतदेह कब्रिस्तानमध्ये दफन केला.
कुटुंबाला ही गोष्ट कळाली तेव्हा त्यांनी तात्काळ पोलिसांना माहिती दिली. त्यानंतर आरोपी सोहेलविरोधात गुन्हा दाखल करण्यात आला. कब्रिस्तानातून नवजात मृतदेहाचे अवशेष काढण्यासाठी सरकारी मेडिकल कॉलेजमधून तज्ज्ञांच्या टीमला बोलावलं. आरोपीने याआधीच दोन लग्न केली आहेत. त्याच्याविरोधात पुरावे गोळा केला जात आहेत. आरोपीला लवकर पकडलं जाईल असं पोलिसांनी म्हटलं आहे.