धक्कादायक! मित्राला बहाण्यानं घराबाहेर पाठवलं; त्याच्या पत्नीला जंगलात नेऊन केला बलात्कार

पीडित महिलेकडून न्यायालयात याचिका दाखल; तपास सुरू

धौलपूर: राजस्थानच्या धौलपूर जिल्ह्यात एका २६ वर्षीय विवाहितेवर तिच्या पतीच्या मित्रानं बलात्कार केल्याची घटना घडली. या प्रकरणी पोलिसांनी कलम ३७६ अ, ३४३, ३७९ आणि ४२० अंतर्गत गुन्हा दाखल केला आहे. या प्रकरणी महिलेची वैद्यकीय चाचणी करण्यात आली असून पोलीस चौकशी सुरू आहे.

पीडित विवाहितेनं या प्रकरणी न्यायालयात याचिका दाखल केली. पतीचा मित्र असलेला आरोपी ४० वर्षांचा असून त्याच्याकडे ट्रॅक्टर आहे, अशी माहिती तिनं याचिकेतून दिली आहे. विवाहितेचा पती आणि आरोपी दशरथ दोघेही मित्र आहेत. 

'पती आरोपी दशरथचा ट्रक चालक म्हणून काम करायचा. त्यामुळे आरोपीचं घरी येणं जाणं होतं. आरोपीनं पीडितेसोबत बोलण्यासाठी एक मोबाईल खरेदी करून दिला होता. आरोपीनं पावणेदोन वर्षांपूर्वी पीडिता आणि तिच्या पतीला धौलपूरला बोलावलं. आरोपीनं बहाणा करून पीडितेच्या पतीला बाहेर पाठवलं. त्यानंतर आरोपीनं महिलेला कारमध्ये बसवलं आणि तिला जंगलात घेऊन गेला. तिथे त्यानं तिच्यावर बलात्कार केला. वाच्यता केल्यास तुझ्या पतीला संपवेन, अशी धमकी त्यानं दिली. त्यानंतर आरोपीनं पीडितेला धौलपूरला सोडलं. तिथून पीडिता तिची घरी गेली,' असा घटनाक्रम याचिकेत नमूद करण्यात आला आहे.