मीरारोड - मीरारोडच्या नया नगर पोलिसांनी १ लाख ८० हजार रुपयांच्या मेफेड्रोन ( एमडी ) ह्या अमली पदार्थासह रोकड मिळून ४ लाख ८३ हजारांचा मुद्देमाल जप्त केला आहे . ४ आरोपीना अटक केली आहे.
गीता नगर फेज ४ , कानुंगो इस्टेट जवळ काही इसम एमडी च्या तस्करीसाठी येणार असल्याची माहिती मिळाल्या वरून नया नगर पोलीस ठाण्याचे वरिष्ठ निरीक्षक कैलास बर्वे यांच्या मार्गदर्शनाखाली पोलीस निरीक्षक दिलीप साळुंखे , उपनिरीक्षक आशुतोष चव्हाण सह पवार, पाटील यांच्या पथकाने सापळा रचला.
एमडी विक्री साठी आलेल्या अल्तमश युसूफ शेख ( ३० ) रा. जनता सेवक सोसायटी , माहीम बस डेपो मागे ; शोएब नूर मोहम्मद कुरेशी ( ३१ ) रा . नया नगर व अल्ताफ युनूस शेख ( ३८ ) रा . गीता नगर फेज ४ ह्या तिघांना अटक करण्यात आली. त्यांच्या कडून ६० ग्रॅम एमडी , ५ ग्रॅम चरस व गुन्ह्यातील २ दुचाकी असा १ लाख ९१ हजारांचा मुद्देमाल जप्त करण्यात आला.
आरोपींच्या तपासात एमडी हे धारावीच्या सचिनम इमारतीत राहणाऱ्या शमशेर उर्फ शम्मी मोहम्मद कुन्नी ( २८ ) ह्याच्या कडून आणल्याचे सांगितले. पोलिसांनी स्थानिक धारावी पोलिसांच्या मदतीने शुक्रवारी शम्मी ह्याला धारावी येथून अटक केली. त्याच्या घरातून १ लाख ८० हजार किमतीचे एमडी , १ लाख २ हजारांची रोकड व २ मोबाईल मिळून २ लाख ९२ हजारांचा मुद्देमाल सापडला आहे.