लखनौ : दारू पार्टी सुरू असताना नवव्या मजल्यावरून पडून एका २४ वर्षीय तरुणीचा मृत्यू झाल्याची धक्कादायक घटना उत्तर प्रदेशची राजधानी असलेल्या लखनौमधील सुशांत गोल्फ सिटी परिसरात घडली आहे. श्रुती वर्मा असं इमारतीवरून कोसळून मृत्यू झालेल्या तरुणीचं नाव आहे. शवविच्छेदनानंतर पोलिसांनी श्रुतीचा मृतदेह कुटुंबीयांच्या हाती सोपवला आहे.
याप्रकरणी मिळालेल्या माहितीनुसार, पार्टीत श्रुतीने मद्याचं सेवन केलं होतं आणि ती बालकनीत सिगारेट पीत होती. तेव्हा ती नवव्या मजल्यावरून खाली कोसळल्याचं बोललं जात आहे. सेलिब्रेटी मीडोज असं सदर इमारतीचं नाव आहे.
NEET ची तयारी करत होती श्रुती
श्रुती वर्मा ही तरुणी NEET परीक्षेची तयारी करत होती. तिचा नवव्या मजल्यावरून पडून मृत्यू झाल्याचं म्हटलं जात असलं तरी तिची हत्या करण्यात आल्याचा संशय कुटुंबीयांनी व्यक्त केला आहे. आधी श्रुतीच्या विनयभंगाचा प्रयत्न करण्यात आला आणि तिने विरोध करताच तिला खाली फेकण्यात आलं, असा दावा कुटुंबातील सदस्यांनी केला आहे. मूळची सीतापूर येथील असलेली श्रुती वर्मा सध्या भाड्याच्या घरात वास्तव्यास होती. रविवारी रात्रीती शुभम राय आणि मंजीत या मित्रांकडे पार्टी करण्यासाठी आली होती.
मित्रांनी काय दावा केला?
पोलिसांना मिळालेल्या प्राथमिक माहितीनुसार, श्रुती मागील काही दिवसांपासून शुभम या तिच्या मित्राच्या फ्लॅटमध्ये राहत होती. शुभम एका आयटी कंपनीत काम करतो. श्रुतीच्या मृत्यूनंतर पार्टीत सहभागी असलेल्या सर्व मित्रांची चौकशी करण्यात आली. पार्टी सुरू असताना श्रुती बाल्कनीत फोनवर बोलत उभी होती, असा दावा तिच्या मित्रांनी केला आहे.