लोकमत न्यूज नेटवर्क, ठाणे: पाकिस्तानसाठी हेरगिरी केल्याप्रकरणी अटकेत असलेल्या कळव्याच्या रवी वर्मा याच्या आईने शनिवारी दुपारी साडेबाराच्या सुमारास ठाणे दहशतवाद विरोधी पथकाच्या कार्यालयाला भेट दिली. यावेळी रवीच्या आईने पोलिसांपुढे हात जोडले. मात्र, मुलाच्या भेटीसाठी आलेल्या आईला काही क्षणात भेटीविना तेथून काढता पाय घ्यावा लागला.
वर्मा याने दिलेल्या माहितीची शहानिशा करण्यासाठी त्याला मुंबईला नेण्यात आल्याची माहिती सूत्रांनी दिली. पण, याबाबत संबंधित विभागाकडून कोणताही अधिकृत दुजोरा देण्यात आलेला नाही. नोव्हेंबर २०२४ मध्ये प्रथम रवीच्या संपर्कात आलेली पायल शर्मा हिच्याशी संवादानंतर मैत्री आणि त्यातून प्रेम झाल्याची माहिती चौकशीत रवी याने दिली. रवीने पाक एजंटांना गोपनीय माहिती फेसबुकवर दिली. प्रेमसंबंध आणि मिळणाऱ्या पैशामुळे माहिती दिल्याचेही जवळपास स्पष्ट झाले.
पाच महिलांची नावे चौकशीत उघड
सात महिन्यांच्या कालावधीच्या पाक एजंटच्या ट्रॅपमध्ये अडकलेल्या वर्माने पाच जेटीसह १४ पाणबुड्या, युद्धनौका, मोठी जहाज याच्यासोबतच सैन्य दलाच्या शस्त्रसाठ्याच्या ठिकाणाची माहिती, बॅकअप प्लॅन काय आहे. नौदलाच्या गोडाऊनमध्ये कुठल्या प्रकारचा शस्त्रसाठा आहे, त्याच्या संरक्षणासाठी तैनात केलेला फौजफाटा त्यासोबतच अन्य माहिती दिली. त्याच्या चौकशीत पायल शर्मा, इस्प्रित, आकृती, सिंगल कुमार, प्रीती कुमार या पाच महिलांची नावे उघड झाली आहेत.
चौकशीत सहकार्य नाही
रवी हा एटीएसला चौकशीत सहकार्य करीत नसल्याचे सूत्रांकडून सांगण्यात आले. तसेच त्याने मोबाइलमधून अनेक माहिती डिलिट केल्याचे सूत्रांनी सांगितले. मात्र, त्याबाबत संबंधित विभागाकडून अधिकृतरीत्या दुजोरा मिळाला नाही.