कल्याण - एका नऊ वर्षाच्या मुलीवर लैंगिक अत्याचार करत तिची गळा चिरून हत्या केल्याचा संतापजनक प्रकार कल्याणमध्ये समोर आला आहे. या घटनेमुळे शहरात एकच खळबळ उडाली आहे. या प्रकरणातील संशयित आरोपीला पोलिसांनी ताब्यात घेतलं असून हा आरोपी अल्पवयीन असल्याची माहिती सूत्रांनी दिली. दरम्यान मृत पीडिता व संशयित दोघेही फिरस्ता असल्याची माहिती पोलिसांनी दिली.
आज सकाळच्या सुमारास कल्याण रेल्वे स्टेशन परिसरातील न्यू मोनिका इमारतीच्या आवारात एक नऊ वर्षाच्या मुलीचा मृतदेह आढळून आला. स्थानिक नागरिकांनी याबाबत महात्मा फुलेनगर पोलिसाना माहिती दिली. घटनेची माहिती मिळताच पोलिसांनी तात्काळ घटनास्थळी धाव घेतली. या अल्पवयीन मुलीवर लैंगिक अत्याचार करत तिची गळाचिरून हत्या करण्यात आली होती. पोलिसांनी या प्रकरणाचा तपास सुरू केला आहे. चौकशी दरम्यान ही मुलगी फिरस्ता असल्याची माहिती मिळताच पोलिसांनी या परिसरातील फिरस्त्यांची चौकशी सुरू केली.
चौकशी दरम्यान एका तरुणावर संशय बळावल्याने पोलिसांनी एका संशयित तरुणाला ताब्यात घेतलं त्यानेच या अल्पवयीन मुलीवर बलात्कार करत तिचे गळा चिरून हत्या केल्याचा पोलिसांना संशय आहे. हा संशयित तरुण अल्पवयीन असल्याची माहिती समोर येत आहे. याप्रकरणी पोलिसांनी गुन्हा दाखल करत पुढील तपास सुरू केला. दरम्यान पीडित मयत तरुणी व संशयित म्हणून ताब्यात घेतलेला तरुण हे दोघे फिरस्ता असून हा स्टेशन परिसरात राहत होते. दरम्यान पोलिसांनी या मयत पीडितेचा मृतदेह शवविच्छेदनासाठी पाठवला आहे .