Nawab Malik Vs Sameer Wankhede: राज्याचे अल्पसंख्याक मंत्री आणि राष्ट्रवादी काँग्रेसचे प्रवक्ते नवाब मलिक यांनी आज पुन्हा एकदा एनसीबीचे विभागीय संचालक समीर वानखेडे यांच्यावर गंभीर आरोप केला आहे. समीर वानखेडे यांच्याकडून फोन टॅप केले जात असल्याचं मलिक यांनी म्हटलं आहे. तसंच वानखेडे यांनी माझी मुलगी नीलोफर हिचेही कॉल डिटेल्स मागितले होते, पण मुंबई पोलिसांनी त्यास नकार दिला होता, असा गौप्यस्फोट नवाब मलिक यांनी केला आहे. समीर वानखेडे मुंबई आणि ठाण्यात दोन लोकांच्या मदतीनं काही बड्या व्यक्तींचे फोन टॅप करत असल्याचाही दावा नवाब मलिक यांनी केला आहे.
एनसीबीनं जुलै महिन्यात नवाब मलिक यांच्या जावयाला ड्रग्ज प्रकरणात अटक केली होती. त्यानंतर समीर वानखेडे मलिक यांच्या निशाण्यावर आहेत. समीर वानखेडे यांनी माझाही फोन टॅप केला होता, असा खळबळजनक आरोप नवाब मलिक यांनी केला आहे. याशिवाय बॉलीवूड सेलिब्रिटींसह अनेक बड्या व्यक्तींचे फोन टॅप करणं समीर वानखेडे यांच्याकडून सुरू आहे, असंही ते म्हणाले. समीर वानखेडे यांना माझं खुलं आव्हान आहे की त्यांनी माझ्याविरोधात अब्रुनुकसानीचा दावा जरूर ठोकून दाखवावा, असं नवाब मलिक यांनी म्हटलं आहे.
समीर वानखेडेंवर केलेल्या आरोपांवर मी ठाम आहे. त्यांनी माझ्याविरुद्ध अब्रुनुकसानीचा दावा दाखल करावा. मी कोर्टाच्या कार्यवाहीला सामोरं जाण्यास तयार आहे, असं नवाब मलिक आज पत्रकार परिषदेत म्हणाले.
वानखेडे यांच्याविरुद्ध सुरू केलेली लढाई आम्ही अशीच पुढे घेऊन जाणार आहोत, असं मलिक यांनी सांगितला. मी जो दाखला ट्विट केला आहे तो खरा आहे. जर तुम्ही लक्षपूर्वक दाखला पाहिला तर तुम्हाला लक्षात येईल की त्यावर नाव वेगळं एका बाजूला लिहिण्यात आलं आहे. समीर वानखेडे जन्मापासून दलित आहेत असं सर्टिफिकेट दिलं. त्याआधारे आत्तापर्यंत नोकरी केली. समीर यांच्या वडिलांनी एका मुस्लिम महिलेसोबत लग्न केलं आणि त्यानंतर ते मुस्लिम म्ह्णून राहत होते. परंतु नोकरीच्या वेळी त्यांनी आपला दाखला बदलला. त्यांनी वडिलांच्या जातीचा वापर केला. जर मी सादर केलेलं सर्टिफिकेट खोटं आहे तर मग त्यांच्या वडिलांनी किंवा स्वतः वानखेडे यांनी आपलं जन्म प्रमाणपत्र समोर आणावं, असं आव्हान मलिक यांनी दिलं.
मला वैयक्तिक बदनामी करायची नाही. परंतु समीर वानखेडेंच्या वडिलांनी धर्मातर करून विवाह केला होता. समीर यांनी बनावट जात प्रमाणपत्र बनवून 'आयआरएस' नोकरी घेतली. याबाबत आपण ठाम आहोत. त्यांनी आपल्या विरुद्ध अब्रुनुकसानीचा दावा दाखल करावा, न्यायालयात सर्व सत्य बाहेर येईल, असं मलिक म्हणाले.