अंबरनाथ - दारू पिताना झालेल्या क्षुल्लक वादातून १८ वर्षीय युवकाची हत्या करण्यात आल्याचा प्रकार अंबरनाथमध्ये आज पहाटेच्या सुमारास घडला आहे. याप्रकरणी पोलिसांनी आरोपी आशुतोष कराळे (19) याला अटक केली आहे .
अंबरनाथ (पूर्व) येथील दत्त कुटीर परिसरात आज शनिवारी पहाटे हा प्रकार घडला. या परिसरात राहणारा अमन शेख (18) आणि आरोपी आशुतोष कराळे हे मित्र होते, या दोघांचे तीन ते चार दिवसांपूर्वी वाद झाले होते. त्यानंतर शुक्रवारी मध्यरात्री दारू पीत असताना पुन्हा एकदा या दोघांमध्ये वाद झाले. यावेळी आशुतोषला अमनने "तू घरी जा" असे म्हटले या गोष्टीचा त्याला राग आला आणि रागाच्या भरात आशुतोषने अमन याच्या पोटात चाकू खुपसला. यात अमनचा जागीच मृत्यू झाला.
या प्रकरणी शिवाजीनगर पोलिसांनी आरोपी आशुतोष यांच्याविरोधात गुन्हा दाखल करून त्याला अटक केली आहे. वरीष्ठ पोलीस निरीक्षक मंजितसिंग बग्गा या गुन्ह्याचा अधिक तपास करीत आहेत.