नवी दिल्ली - राजधानी दिल्लीतील गोकलपुरी परिसरातून एक हृदयद्रावक घटना समोर आली आहे. याठिकाणी एका १८ वर्षीय मुलाने इंस्टाग्रामवर एका मुलीशी बोलल्यामुळे २० वर्षीय तरुणाचा भोसकून खून केला. पोलिसांनी आरोपी अमरानला अटक केली आहे. अमरान एका मुलीशी बोलत असे त्याच मुलीसोबत माहिर नावाचा मुलगाही बोलत असायचा.
मिळालेल्या माहितीनुसार, अरमान आणि माहिर दोघेही एकाच मुलीला डेट करत होते. या मुलीशी त्या दोघांची इन्स्टाग्रामवर ओळख झाली होती. मात्र, या इंस्टाग्राम रोमान्सचे लवकरच मोठ्या गुन्ह्यात रूपांतर झाले आणि अनेकांचे आयुष्य बदलले. मुलीने माहिरशी बोलू नये असे अरमानला वाटत होते. यावरून दोघांमध्ये भांडण झाले. एकदा अरमानने व्हिडिओ कॉलदरम्यान माहिरला शिवीगाळही केली होती. मुलगी माहिरची बाजू घेतल्याचे आरोपीला वाटत होते.
अरमानने तरुणीसोबत गैरवर्तन केले होते. त्याने मुलीचा मोबाईलही हिसकावून घेतला. माहिरसोबत सुरू झालेला हा वाद अरमानच्या मनात घर करून बसला आणि त्याने माहिरसोबत बदला घेण्याचे ठरवले. मुलीचा फोन परत करण्याच्या बहाण्याने त्याने माहिरशी संपर्क साधला. माहिर फोन परत घेण्यासाठी गेला असता अरमानने त्याच्यावर चाकूने हल्ला करून त्याची हत्या केली. अरमानला मित्र फैसल, मोहम्मद समीर यांच्यानंतर मुलीच्या सांगण्यावरून पुराव्याच्या आधारे अटक करण्यात आली आहे.
माहिरचा मृतदेह भागीरथी विहारच्या रस्त्याशेजारी सापडला. त्यानंतर पोलिसांनी या घटनेचा तपास सुरू केला. त्यानंतर गुन्हा दाखल करत आरोपी अरमानला बेड्या ठोकल्या. सुरुवातीच्या तपासात माहिरच्या शरीरावर चाकूने वार केल्याच्या खूना आढळल्या. पोलिसांनी घटनास्थळावरून चाकू जप्त केला. मृतदेह पोस्टमोर्टमसाठी पाठवला. तपासात पोलिसांनी परिसरातील सीसीटीव्ही फुटेज तपासले. मृत मुलाचे कॉल डिटेल्स काढले. त्यात अरमानचा नंबर पुढे आला. अरमान आणि माहिर दोघेही एकाच मुलीसोबत बोलायचे. तपासात मुलीचा जबाब नोंदवण्यात आला. त्यानंतर आरोपींचे लोकेशन ट्रेस करून तिघांना अटक केली. सध्या पोलीस या घटनेचा आणखी तपास करत आहेत.