लोकमत न्यूज नेटवर्क
मुंबई: कॉलेजसाठी बाहेर पडलेल्या अल्पवयीन मुलीचे अपहरण करत एक लाखात राजस्थानमधील व्यक्तीसोबत तिचे लग्न लावून दिल्याचा धक्कादायक प्रकार पार्क साईट पोलिसांच्या कारवाईतून उघडकीस आला आहे. याप्रकरणी पार्क साईट पोलिसांनी मुलीसोबत लग्न करणाऱ्या व्यक्तींसह तिची विक्री करणाऱ्या चौकडीला अटक केली आहे.
पोलिसांनी दिलेल्या माहितीनुसार, २३ डिसेंबर रोजी कॉलेजसाठी घराबाहेर पडलेली १७ वर्षीय मुलगी घरी परतली नाही म्हणून कुटुंबीयांनी पोलिसांत धाव घेतली. हरविलेल्या मुलीचा मोबाइल बंद असल्याने तांत्रिक विश्लेषण करण्यात आले. २३ डिसेंबर रोजी मुलगी दादर रेल्वे स्टेशन येथे पुरुष व महिलेसह दादर हुबळी एक्स्प्रेस मध्ये चढताना दिसली. पोलिसांनी हाच धागा पकडून तपास सुरु केला. चौकशीत जोडप्याने मिरजचे तिकीट काढल्याचे निष्पन्न झाले.
पोलिस पथकाने तत्काळ मिरज रेल्वे स्टेशन येथील सीसीटीव्ही फुटेज तपासले. २४ डिसेंबर रोजी मुलगी दोघांसोबत दुचाकीवरून जाताना दिसली. दुचाकीच्या क्रमांकावरून पोलिसांनी तपास सुरु केला. दुचाकी संबंधित व्यक्तीने दादर रेल्वे स्टेशन येथून लगेजद्वारे मिरजला नेल्याचे उघड झाले. दादर रेल्वे स्टेशन येथून लगेजद्वारे पाठविलेल्या मोटारसायकलबाबत सविस्तर माहिती मिळताच, संबंधित व्यक्ती आणि त्याच्या सोबतची महिला २२ तारखेला चेंबूर येथे तिच्या पतीला भेटण्यासाठी आल्याचे उघड झाले.
१६ जानेवारी रोजी पथक तिच्या पती पर्यंत पोहचले. त्याच्याकडून मुलीसोबत असणारी महिला त्याची पत्नी सुनीता उर्फ सुधा मनोज जोशी (२४), पत्नीचा मामा लडप्पा लक्ष्मण गोवी (३४) असल्याचे सांगितले. ते मूळचे कर्नाटकच्या हिरापूरचे रहिवासी आहे. त्यानुसार पथकाने कारवाई करत मुलीची सुटका केली.
या पथकाची कामगिरी
पार्क साईट पोलिस ठाण्याचे वरिष्ठ पोलिस निरीक्षक विनायक मेर, तपास अधिकारी प्रमोद सानप, विकास पाटील आणि अंमलदार यांनी ही कारवाई केली आहे.
औरंगाबादमधून मुलगी ताब्यात
सुनीता आणि तिच्या मामाने मुलीचे कर्नाटकच्या गणपती हरिश्चंद्र कांबळे (५०) यांच्या मार्फत राजस्थानच्या एका दुकानदारासोबत १ लाखाला विक्री करून लग्न लावून विक्री केल्याचे उघड झाले. त्यानुसार, पथक औरंगाबाद तसेच कर्नाटक येथे रवाना झाले. हरवलेली मुलगी आणि लग्न लावून दिलेला भावाराम पदमाराम माली यांना औरंगाबाद येथून ताब्यात घेऊन पथक मुंबईत आले.