जयपूर - राजस्थानमधील अजमेर जिल्ह्यात एक महिला तिच्या २५ दिवसांच्या बाळाला घेऊन कायद्याच्या दारात पोहोचली आहे. या महिलेने लेखी तक्रारीमधून तिच्या प्रियकरावर अनेक आरोप केले आहेत. या महिलेने सांगितले की, लग्नाचे आमिष दाखवून एका व्यक्तीने तिच्यासोबत पाच वर्षे शरीर संबंध ठेवले. दरम्यान, यावर्षी जेव्हा ती गर्भवती राहिली तेव्हा हा प्रियकर तिला सोडून पळून गेला. गेल्या १५ सप्टेंबर रोजी या महिलेने एका मुलाला जन्म दिला. आता या नवजात बाळाला घेऊन ही महिला दारोदार फिरत आहे. पोलीस ठाण्यात या महिलेने आरोपी प्रियकराविरोधात लग्नाचे आमिष दाखवून बलात्कार केल्याचा गुन्हा दाखल केला आहे. तसेच लवकरच आरोपीला अटक करण्याची मागणी केली आहे. या प्रकरणी अजमेरमधील रामगंज पोलिसांनी गुन्हा दाखल करून घेतला असून तपास सुरू केला आहे.
अजमेरच्या रामगंज पोलीस ठाण्याचे प्रभारी सतेंद्र सिंह नेगी यांच्या नेतृत्वाखाली या प्रकरणाचा तपास सुरू आहे. नेगी यांनी सांगितले की, चंद्रबरदाईनगर येथील पीडितेने या प्रकरणी तक्रार दिली आहे. पीडितेने सांगितले की, जून २०१६ मध्ये अजमेर येथे झालेल्या विवाहादरम्यान, तिची ओळख हरियाणामधील अरुण चूग याच्याशी झाली होती. त्यानंतर दोघांमधील संपर्क वाढला. तसेच हळुहळू त्याचे रूपांतर प्रेमात झाले. त्यानंतर अरुणने तिला त्याच्यासोबत राहण्याची ऑफर दिली. तक्रारीतील उल्लेखानुसार महिलेने अरुणला सांगितले की, ती विवाहित आहे. तसेच पतीपासून वेगळी राहते. मात्र तिचा घटस्फोट झालेला नाहीत. तसेच तिला एक मुलगी असल्याचेही सांगितले. आरोपी अरुणने महिलेला लग्न करण्याचे आश्वासन दिले.
अरुणच्या भूलथापांना बळी पडून ही महिला आणि अरुण तिच्याच घरी एकत्र राहू लागले. अरुणने विवाहाचे आमिष दाखवून या महिलेशी शरीरसंबंध प्रस्थापित केले. त्यानंतर अरुण या महिलेला सोडून गायब झाला, तसेच त्याने तिच्याशी असलेला संपर्क तोडला. या दरम्यान, या महिलेने अनेकदा त्याला फोन केला. मात्र त्याने फोन उचलला नाही. १५ सप्टेंबर रोजी पीडितेने एका मुलाला जन्म दिला. आता पीडितेने आरोपीविरोधात लग्नाचे आमिष दाखवून बलात्कार केल्याचा आरोप केला आहे.