ठळक मुद्देठाणे येथील कापूरबावडी परिसरातील एका सोसायटीत अविनाशने मे महिन्यात रुम भाड्याने घेतली होतीपोलिसांना आरोपीजवळील मोबाइलमध्ये २९४ अश्लील व्हिडिओ आणि फोटो आढळले आहेत.
ठाणे - सोसायटीतील महिलांचे अश्लील व्हिडीओ शूट करणाऱ्या अविनाश कुमार यादव (३४) या तरूणाला कापूरबावडी पोलिसांनीअटक केली आहे. पोलिसांना आरोपीजवळील मोबाइलमध्ये २९४ अश्लील व्हिडिओ आणि फोटो आढळले आहेत. पोलिसांनी अविनाशला अटक केली असून तो सध्या पोलीस कोठडीत आहे.
ठाणे येथील कापूरबावडी परिसरातील एका सोसायटीत अविनाशने मे महिन्यात रुम भाड्याने घेतली होती. दोन ते तीन महिन्यांपूर्वी तो त्या रूमवर पत्नीसह रहायला आला होता. आयआयटी दिल्लीतून शिक्षण पूर्ण करून तो आयआयटी मुंबईत पीएचडीचे शिक्षण घेण्यासाठी आल्याची माहिती पोलिसांनी दिली. रात्री - अपरात्री सोसायटीच्या परिसरात तो संशयास्पद फिरायचा. त्यामुळे सोसायटीत रहायला आल्यापासूनच अविनाशवर अनेकांना संशय होता.
शुक्रवारी रात्री १० च्या सुमारास अविनाश सोसायटीच्या मागील बाजूला फेऱ्या मारत होता. काही वेळाने तो सोसायटीतल्या तळमजल्यावरील एका घरातील बाथरूमची लाइट लागल्यानंतर त्या ठिकाणी जाऊन मोबाइलनेचित्रीकरण करू लागला. त्यावेळी त्याच्या मोबाइलची फ्लॅश लाइट सुरू राहिल्यामुळे बाथरूममधील व्यक्तीला ही बाब लक्षात आली. त्या व्यक्तीने आरडाओरडा केला. त्यावेळी सोसायटीतील सुरक्षा रक्षक आणि नागरिकांनी पळून जाण्याच्या प्रयत्नात असलेल्या अविनाशला रंगेहाथ पकडलं. त्याचा मोबाइल तपासला असता त्याच्या मोबाइलमध्ये सोसायटीतील काही महिलांचे अश्लील व्हिडीओ होते. सोसायटीतील नागरिकांनी तातडीने कापूरवाडी पोलिसांना बोलावून अविनाशला स्वाधीन केलं. पोलीस तपासात अविनाशच्या मोबाइलमध्ये २९४ अश्लील व्हिडीओ, फोटो आढळून आले. या प्रकरणी पोलिसांनी अविनाश विरोधात गुन्हा नोंदवला असून पोलीस अधिक तपास करत आहेत.