रोहतक - हरियाणाच्या रोहतक येथील जिल्हा काँग्रेस नेत्या हिमानी नरवालची हत्या करणारा मुख्य आरोपी पोलिसांच्या अटकेत आहे. या आरोपीची पोलीस चौकशी सुरू आहे. तपासात आरोपी सचिनने अनेक खळबळजनक दावे केले आहेत. पोलीस याबाबत दुपारी पत्रकार परिषद घेत खुलासा करणार आहे. हिमानी नरवाल काँग्रेसची सक्रीय कार्यकर्ता होती. तिचा मृतदेह सांपाला बस स्टँडजवळील एका सुटकेसमध्ये आढळल्यानं खळबळ माजली. पोलिसांनी या प्रकाराची गंभीर दखल घेत तात्काळ तपासाला सुरूवात केली आणि आरोपीला अटक करण्यात आली.
कोण आहे आरोपी सचिन?
पोलिसांनी या प्रकरणात ज्या आरोपीला अटक केली आहे त्याचे नाव सचिन आहे. सचिन बहादूरगडच्या खैरपूर गावातील रहिवासी आहे. त्याचे वय ३२ वर्ष असून त्याला २ मुले आहेत. त्याने प्रेमविवाह केला होता. सचिनचे वडील ड्रायव्हर आहेत तर सचिन कनौदा गावात मोबाईल दुरूस्तीचं दुकान चालवतो. पोलीस सचिनची चौकशी करत आहेत. त्याची भूमिका आणि या हत्याकांडात सहभागी अन्य लोकांचा शोध घेण्याचा पोलीस प्रयत्न करत आहेत.
आरोपी पोलिसांच्या तावडीत कसा सापडला?
हिमानी नरवाल हत्येचा शोध घेण्यासाठी पोलिसांच्या पथकाने विजयनगर ते सांपलापर्यंत १२८ सीसीटीव्ही फुटेज पडताळले. त्यात एक फुटेज हिमानीच्या घराजवळील आढळला. त्यात एक युवक सुटकेस घेऊन जाताना दिसतो. सीसीटीव्ही फुटेज फार दूरचे असल्याने युवकाचा चेहरा फारसा दिसत नव्हता. मात्र तरीही पोलिसांनी अथक प्रयत्न करून आरोपीला अटक करण्यात यश मिळवलं. हिमानीच्या घरीच तिचा खून केल्याचा पोलिसांना संशय होता त्यानंतर मृतदेह सुटकेसमधून बस स्टँडजवळ फेकण्यात आला त्या अँगलने पोलिसांनी तपासाला सुरूवात केली.
दरम्यान, काँग्रेस नेत्या हिमानी नरवाल यांच्या आईने मुलीचा खून केलेल्या आरोपीला फाशी द्या अशी मागणी केली आहे. माझी मुलगी माझ्यापासून काही लपवत नाही. मला प्रत्येक गोष्ट सांगते. पैशांच्या बाबतही ती माझ्याशी बोलते. पक्षातील दुसरे नेतेही मुलीला पैसे देण्यासाठी तयार होते परंतु माझ्या मुलीने आजपर्यंत कुणाकडून पैसे घेतले नाहीत असं सांगत मुलीच्या मारेकऱ्याला कठोर शिक्षा द्या असं हिमानीच्या आईने मागणी केली आहे.