मुंबई - किरकोळ वादातून 40 वर्षीय दारुड्याने एका महिलेसह तिच्या लहान मुलावर धारदार शस्त्राने हल्ला केल्याची धक्कादायक घटना रविवारी गोवंडीमध्ये घडली. अब्दुल उर्फ बब्बू चौधरी असे या हल्लेखोर आरोपीचे नाव असून गंभीर दुखापतीचा गुन्हा दाखल करुन देवनार पोलिसांनी त्याला बेड्या ठोकल्या असल्याची माहिती पोलीस उपायुक्त शहाजी उमप यांनी लोकमतशी बोलताना सांगितले.
पोलिसांनी दिलेल्या माहितीनुसार, पीडित महिला गौतमनगर परिसरात कुटूंबासोबत राहत असून तिच्या पतीचा हॉटेल व्यवसाय आहे. परिसरात राहणारा आणि हॉटेलमध्ये जेवणासाठी येत असलेल्या बब्बूला परिचय होता. शनिवारी दुपारी महिला कुटूंबियांसोबत घरामध्ये जेवण करत असताना दारुच्या नशेमध्ये बब्बूने त्यांना शिविगाळ करण्यास सुरुवात केली. घरातून कोणीतरी आपल्या अंगावर थुकल्याचे सांगत बब्बू शिविगाळ करत होता. याचा जाब विचारल्याने तो या विवाहितेला मारहाण करण्यासाठी धावला. मात्र, स्थानिक जमा होत असल्याचे बघून तो पसार झाला होता. रविवारी दुपारी दिडच्या सुमारास महिला मुलासोबत घराबाहेर एकटीच असल्याचे हेरुन बब्बूने दोघांवरही हल्ला करुन पळ काढला. हल्ल्याची माहिती मिळताच घटनास्थळी पोहचलेल्या देवनार पोलिसांनी दोन्ही जखमींना तात्काळ उपचारांसाठी जवळच्या रुग्णालयात दाखल केले. या जखमी महिलेचा जबाब नोंदवून तिच्या तक्रारीवरुन याप्रकरणी गुन्हा दाखल करण्यात आल्याचे पोलिसांनी सांगितले.